PARAUGAS DA LINGUA Coordinadora de Equipos de Normalización e Dinamización Lingüística da Barbanza.

ADHESIVO DA CANDELORIA

2012-01-27T14:47:00.000-08:00

Desde a Coordinadora elaborouse este adhesivo para distribuír polo Día da Candeloria.

KARAOKE "GALICIA"

2012-01-19T12:54:00.000-08:00

Karaoke da canción de Os Carunchos, sobre o fermoso poema do escritor Manuel María

KARAOKE "ISTE VAISE"

2012-01-19T12:52:00.000-08:00

Karaoke sobre a canción de Fuxan os Ventos Iste vaise

KARAOKE "O CUCO"

2012-01-19T11:55:00.000-08:00

Karaoke coa canción de Suso Vahamonde do poema de Manuel María O cuco

KARAOKE "O PIRIMPIMPÍN"

2012-01-19T11:51:00.000-08:00

Karaoke sobre a canción de Malvela, moi coñecida por formar parte da banda sonora dunha prestixiosa serie da TVG

ACTIVIDADE LIM "O APALPADOR"

2011-12-10T15:30:00.000-08:00

NADAL EN GALEGO

2011-12-09T07:44:00.000-08:00

Na páxina da Coordinadora Galega podemos atopar distintas actividades para traballar o Nadal en galego: postais dixitais, actividades en liña, Apalpador, teatro. cancións,... Non deixes de visitala.

AUTOCOLANTE PARA AGASALLAR NO NADAL

2011-12-09T07:32:00.000-08:00

Co fermoso deseño dun alumno/a do IES Leliadoura de Ribeira, elaborouse este calendario que se distribuirá nos centros este Nadal

QUE NON CHE CALEN A BOCA (CEP CADRECHE. A POBRA)

2011-06-26T00:44:00.000-07:00

DIPTICO CON RECOMENDACIÓN DE LECTURAS PARA ESTE VERÁN.

2011-06-12T10:49:00.000-07:00

Open publication - Free publishing - More lecturas

HOMENAXE A AGUSTIN FERNÁNDEZ PAZ NO ACTO DO 20 ANIVERSARIO DOS EQUIPOS DE NORMALIZACION LINGÜÍSTICA.

2011-06-12T10:42:00.000-07:00

Nova en Cultura Galega.
Nova en Galicia Hoxe.

ANIVERSARIO DOS EQUIPOS DE NORMALIZACIÓN.

2011-05-28T09:33:00.000-07:00

CEIP DE AGUIÑO: LIBRO XIGANTE E INTERACTIVO DE LOIS PEREIRO.

2011-05-28T09:30:00.000-07:00

IES FELIX MURIEL:CARTEIS DE LOIS PEREIRO

2011-05-28T09:22:00.000-07:00

IES FELIX MURIEL: REPRESENTACIÓN DA VIDA E OBRA DE LOIS PEREIRO POLO ACTOR NOIES SERAFIN MARCOS.

2011-05-28T09:19:00.001-07:00

CEP SALUSTIANO REY EIRAS: VIDEO SOBRE LOIS PEREIRO.

2011-05-28T09:12:00.000-07:00

IES FELIX MURIEL: QUE NON CHE TAPEN A BOCA.

2011-05-28T09:06:00.000-07:00

MAIOS E EXPOSICIÓN DE LOIS PEREIRO DE ESCOLARES EN RIANXO.

2011-05-27T23:35:00.000-07:00

Cantando nas aulas do Barbanza. CRA DE RIANXO: A NOSA LINGUA CON DISTINTOS RITMOS: A LINGUA QUE TES!

2011-05-27T23:26:00.000-07:00

CARREIRA POLA LINGUA EN RIANXO

2011-05-27T23:22:00.001-07:00

Cantando nas aulas do Barbanza. Ceip de Aguiño: QUE NON CHE CORTEN A LINGUA!

2011-05-27T23:20:00.000-07:00

Cantando nas aulas do Barbanza. Ceip de Frións: QUE NON CHE CALEN A BOCA!

2011-05-27T23:17:00.001-07:00

Webquest:Descubrindo a Lois (Ies Leliadoura)

2011-05-27T23:13:00.000-07:00

Descubrindo a Lois.

CASIÑAS POÉTICAS DE LOIS PEREIRO NO CEIP DE AGUIÑO.

2011-05-08T10:21:00.002-07:00

TRÍPTICO SOBRE LOIS PEREIRO.

2011-05-08T10:21:00.001-07:00

Open publication - Free publishing - More lois

CAMPAÑA SOBRE AS ACTITUDES LINGÜÍSTICAS: POR QUE O PREGUNTAS?

2011-05-08T10:09:00.000-07:00

Campaña.

LETRAS GALEGAS 2011.

2011-05-08T09:59:00.000-07:00

A MAN DEREITA Á DEREITA DO CORPO
A MAN ESQUERDA Á ESQUERDA.
EN PLENAS FACULTADES,
TEÑO A CABEZA NO CENTRO DO MUNDO
E VOULLE CAMBIANDO OS ARGUMENTOS
ÓS MEUS SOÑOS ESCASOS E PRUDENTES.

Recursos na páxina da Coordinadora Galega.

RECURSOS PARA TRABALLAR NO ENTROIDO.

2011-02-27T03:36:00.000-08:00

Recursos recopilados pola Coordinadora Galega.

ENCONTROS.

2011-02-27T03:33:00.001-08:00

Información dos encontros.

DÍA DA MULLER TRABALLADORA: HOMENAXE A UN MAR DE MULLERES GALEGAS.

2011-02-27T03:28:00.000-08:00

DÍA DA CANDELORIA, DÍA DO AMOR EN GALICIA.

2011-02-06T03:34:00.001-08:00

Este curso a Coordinadora de Equipos de Normalización do Barbanza decidiu facer un deseño a partir da Herba de Namorar cuns versos de Faltriqueira. Numerosos centros repartiron o autocolante entre o seu alumnado e pegaron carteis con este deseño.

Desexamos que o AMOR tamén sexa pola NOSA LINGUA!

PREMIOS BARBANTIA 2010. PARABÉNS!

2010-12-06T02:30:00.001-08:00

O gaiteiro Pepe Romero, o teólogo Andrés Torres Queiruga e os Equipos de Normalización Lingüística foron elixidos polos socios de Barbantia para recibir os Sirenos de Bronce 2010 que entrega a Asociación Cultural Barbantia.
Pepe Romero conseguiu a distinción correspondente á traxectoria cultural no Barbanza, na que foron finalistas Manuel Mariño, Paola García e Xoán Mariño.
Torres Queiruga leva o sireno da cultura galega, superando a Eva Veiga, Soledad Penalta e Xosé Ramón Barreiro.
A Coordinadora de Equipos de Normalización Lingüística faise co galardón á iniciativa cultural, por diante do Liceo de Noia, a Casa da Gramática e o Ateneo Valle-Inclán.

A voz.

PEPE ROMERO, TORRES QUEIRUGA E COORDIANDORA DE EQUIPOS DE NORMALIZACIÓN DO BARBANZA RECIBEN O PREMIO BARBANTIA 2010

2010-11-28T00:55:00.001-08:00

A COORDINADORA DE EQUIPOS DE NORMALIZACIÓN RECIBE O PREMIO ALTOFALANTE EN RIBEIRA.

2010-11-22T11:06:00.001-08:00

Nun acto no que non faltaron as gaitas de Algharabía nin as pandeiretas de Lumieira, a entidade Altofalante de Ribeira entregou o sábado, no conservatorio ribeirense, o premio instituído no 2006, co que se recoñece o traballo de quen difunden a lingua galega e a súa cultura. Nesta ocasión o distintivo recibiuno a Coordinadora Galega de Equipos de Normalización Lingüística, á quen o presidente de Altofalante, Xosé Antonio Vázquez Cobas, animou a manter o labor desempeñado ata agora.
Vázquez Cobas, quen asegurou que o galego impregna a sociedade dun xeito transversal, con independencia de clases sociais e ideoloxías políticas, subliñou que o distintivo á Coordinadora Galega de Equipos de Normalización Lingüística era un xeito de darlle ánimos «xa que na súa andaina recibiu todo tipo de descalificacións».
Precisamente, este colectivo, do que agora forman parte 600 mestres de toda a comunidade, tivo a súa orixe no municipio de Ribeira. Entre os mestres que contribuíron ao seu nacemento atópanse Miguel Louzao, secretario da coordinadora que, naquel momento, impartía clases en Ribeira. Do presidente de Altofalante recibiu o premio. Sen embargo, o diploma quixo entregarllo outro docente, Luís Teira, que tamén tivo unha implicación decidida neses primeiros anos de vida do colectivo.
Voluntarios
Na súa intervención, Miguel Louzao dixo que o Altofalante era o primeiro galardón que recibía a coordinadora e non ocultou que lle causou sorpresa.
Ao mesmo tempo, comentou que as persoas que pertencen a neste colectivo traballan de forma voluntaria, no seu tempo libre, porque aman o galego. Tamén indicou que a coordinadora xurdiu por un grupo de xente que consideraba que era preciso dinamizar o ensino no galego. Nese sentido, precisou que nos seus inicios o colectivo estaba integrado por trinta persoas e que pouco a pouco foise sumando xente de toda Galicia.
Na entrega do premio estiveron presentes, entre outros, a voceira do BNG, Dominga Brión, e a concelleira e deputada provincial Rosana Pérez
A nova na Voz de Galicia.

PARA COÑECER A COORDINADORA GALEGA DE EQUIPOS DE NORMALIZACIÓN EN 5 MINUTOS.

2010-11-17T08:41:00.000-08:00

INFORMACIÓN SOBRE A COORDINADORA GALEGA DE EQUIPOS DE NORMALIZACIÓN.(Folleto para imprimir)

O GALEGO O NOSO MEDIO NATURAL

2010-11-17T08:36:00.000-08:00

CAMPAÑA: O GALEGO O NOSO MEDIO NATURAL.

AUTOCOLANES PARA AGASALLAR NESTE NADAL: NON CALES A BOCA E O APALPADOR.

2010-11-12T11:25:00.000-08:00

(Deseño a partir da obra de Leandro Lamas)

Os deseños foron feitos e elexidos pola Coordinadora dos Equipos de Normalización do Barbanza e serán repartidos nos colexios polo Nadal.

PARABÉNS Á COORDINADORA GALEGA DE EQUIPOS DE NORMALIZACIÓN LINGÜÍSTICA.

2010-11-12T11:19:00.000-08:00

Coordinadora Galega de Equipos de Normalización.
Premio Altofalante 2010 á Coordinadora Galega de Equipos de Normalización e Dinamización Lingüística.
Ribeira, polo San Martiño de 2010. O presidente da asociación cultural ribeirense Altofalante, Xosé Antonio Vázquez Cobas, informa da decisión tomada este ano para conceder o premio Altofalante 2010. Como é costume en Certo, reproducimos íntegra a acta do xurado:

A Xunta Directiva da Asociación Cultural Altofalante, celebrada o sábado 2 de outubro de 2010, entre outros asuntos, por unanimidade acordou:

Conceder o premio Altofalante do Ano 2010, á Coordinadora Galega de Equipos de Dinamización e Normalización Lingüística (CGEDNL)

Esta entidade agrupa a profesorado e Equipos de Normalización Lingüística que desenvolven a súa actividade no seo dos centros de ensino do país, de cara a que o alumnado saia da escolarización obrigatoria sendo competente na nosa lingua.

A Xunta directiva destacou como méritos á hora de conceder o premio, os seguintes:

•Ser quen de xuntar a unha parte moi importante das comunidades educativas de Galicia de cara a coordinarse e actuar conxuntamente no ámbito da normalización lingüística nos centros.
•Participar activamente -dando argumentos pedagóxicos e lingüísticos- da necesidade de que o noso idioma teña maior presenza no sistema educativo.
•A capacidade para integrar no seo da organización a profesionais do ensino público, privado e privado-concertado e de todos os niveis educativos.
•Organizar campañas de sensibilización e dinamización da nosa lingua como poden ser “Orgullosos no noso. Orgullosos do Galego” que foron un grande éxito de proxección pública.

Premios Anticiclón e Borrasca 2010

2010-06-25T08:38:00.000-07:00

Estes premios simbólicos, que naceron hai dous cursos como unha maneira de promover o uso do galego, recompensan co Anticiclón o labor de empresas e institucións que fan un uso normalizado da lingua e, no caso do premio Borrasca, deixan en evidencia aos que o ignoran. Nesta terceira edición, a Coordinadora comarcal de equipos de normalización recoñeceu o bo labor do Centro Empresarial da Construción do Barbanza (CECB) e reprobou as prácticas lingüísticas dos centros de saúde do Barbanza.

Considerouse o CECB merecedor do premio Anticiclón polo uso normal do idioma que se aprecia na súa web, nas instalacións, nas comunicacións públicas e nas actividades que realiza.

O premio Borrasca foi parar aos centros de saúde do Barbanza, xa que os profesionais da sanidade pública, na maioría dos casos, non se expresan en galego, como acontece con case toda a cartelería, que está en exclusiva en castelán. Na comarca do Barbanza, a maioría das persoas fan un uso normalizado do galego, polo que é evidente que os seus dereitos lingüísticos non se están a respectar.

Na Voz

No meu mar, na miña lingua

2010-06-13T03:43:00.000-07:00

Boa parte do material elaborado polo ENDL do IES Félix Muriel dentro do premiado proxecto No meu mar, na miña lingua, presentado o 31 de maio, xa está accesíbel desde a rede.
En concreto, trátase dun atractivo vocabulario, con definicións, imaxes e correspondencias noutros idiomas, de elementos relacionados coas embarcacións tradicionais e os deportes náuticos, froito dun traballo de investigación terminolóxica desenvolto nestes tres últimos anos.
Os nosos parabéns.
En pdf, aquí.

As ANPAS de Ribeira denuncian drásticos recortes

2010-06-12T16:25:00.000-07:00

As ANPAS de varios centros veñen de denunciar a drástica redución das subvencións concedidas pola Consellería de Educación para os ENDL. Nalgúns colexios e institutos, a diminución chega ao sesenta por cento. Este é o caso, por exemplo, do Instituto de Coroso, que o pasado curso recibía 2.500 euros e neste ano tan só lle foron asignados 816. A mesma contía recibiu o IES Leliadoura, que o pasado ano contou cunha axuda de 1.635 euros.

Con esta redución, que no conxunto da comarca chega ao 35 por cento, moitos proxectos que estaban en marcha e funcionaban correctamente sufriron unha paralización e houbo que priorizar unhas actividades sobre outras ante a imposibilidade económica de levalas a cabo.

Menos recursos

Os recortes nas axudas aos equipos de normalización lingüística súmanse á diminución de recursos noutras áreas educativas que inciden directamente na calidade da formación dos nenos.

En materia lingüística reducíronse os programas de intercambio para estudar idiomas no estranxeiro. Pero isto non é o máis grave, xa que dende as asociacións de pais sospeitan que os recortes afectarán mesmo á contratación de profesores, chegando a ter que suprimir algunhas materias.

Revisión

As ANPAS dos colexios de Carreira, Frións, Olveira, O Grupo, Aguiño e os Institutos Número 1 e Leliadoura non quedarán de brazos cruzados ante a merma que se está a producir na calidade do ensino público. De momento, xa remitiron un escrito á Consellaría de Educación solicitando a revisión das axudas e dotación do persoal dos centros.

Así mesmo, levarán este problemas ás confederacións de ANPAS a nivel provincial e autonómico para tratar uns recortes que supoñen unha media dun vinte por cento en toda Galicia.

Fonte: Canal Rías Baixas.
Máis, na Voz.

Co galego a todas as partes

2010-06-08T15:32:00.000-07:00

Alumnado de 3º A do CEIP Aguiño

Veciños de a pé poñen cara ao galego

2010-06-08T13:02:00.000-07:00

Reportaxe da Voz

Barbanceses máis ou menos coñecidos nas súas vilas son os protagonistas dunha campaña de concienciación promovida polos equipos de normalización da bisbarra.

Seguramente, foron moitos os barbanceses que nos últimos días se sorprenderon ao ver a fotografía de algún veciño nuns carteis repartidos por distintos establecementos comerciais da bisbarra. O xuíz de paz de Rianxo, unha mestra de perruquería ribeirense, o responsable dun dos bares máis concorridos de Santa Uxía ou a estanqueira de Asados protagonizan unha campaña posta en marcha pola Coordinadora de Equipos de Normalización Lingüística de Barbanza dos centros de ensino da comarca e póñenlle cara ao uso do galego. A idea e demostrar que o idioma propio de Galicia é perfectamente válido para o seu uso en todos os eidos, e, para iso, os promotores da iniciativa buscaron a persoas representativas de cada municipio.

Segundo explicou o presidente da coordinadora, Miguel Louzao, a campaña estase a desenvolver en tres municipios de Arousa norte -Ribeira, A Pobra e Rianxo- e os carteis distribuídos en cada un deles corresponden cos que protagonizan os veciños de cada lugar. En canto á selección dos participantes, foron os equipos de normalización os encargados de buscar a «persoas representativas, profesionais coñecidos nas distintas localidades que fagan un uso normalizado do galego».

Con estes criterios, reuniuse unha selección de persoas que traballan nos eidos máis diversos e que teñen en común o uso do idioma autóctono. Así, na campaña participan dende autónomos a xente que traballa no mar, unha educadora social, un libreiro ou funcionarios. «Queremos romper con esa falacia de que o galego é só cousa duns poucos e demostrar que o usa moita xente en distintos eidos», explicou Louzao.

«Eu, tamén»

A campaña leva por lema Eu, tamén en galego , e xurdiu para dar resposta ao novo decreto do galego rexeitándoo e tratando de concienciar aos barbanceses de que se trata dun idioma válido para o seu uso en todos os ámbitos, no educativo e nos distintos eidos profesionais.

E os encargados de facer chegar esta mensaxe tamén son os autores das expresións que aparecen nos carteis. Frases coma «Eu sempre caso en galego», «Falar galego é natural», «Eu tamén poño copas en galego». «Eu falo, penso e sinto en galego» ou «O galego séntalle ben a todo o mundo» saen da boca dos protagonistas das fotografías.

En canto ao éxito da iniciativa, é difícil de cuantificar pero, se tal e como se comentou o día que se deu a coñecer a campaña o obxectivo era impactar e chamar a atención dos cidadáns, dende logo que se conseguiu porque, dende que saíron á rúa, é fácil ver a ribeirenses ou rianxeiros observando as fotografías dos seus veciños e comentando a imaxe. De feito, houbo incluso quen pasaba de largo e deu volta para ver ben o cartel ao percibir unha cara coñecida no papel.

Iso de pasar de ser unha persoa anónima a poñer cara a unha campaña mediática comentábao unha das protagonistas, que o día da presentación de Eu, tamén en galego , recoñecía que sentiu un pouco de vergoña ao verse nos carteis. Pero, máis alá das anécdotas e comentarios que se deriven da campaña, promotores e protagonistas coinciden en que o que importa é a defensa do idioma.

Os protagonistas

Nesta ocasión foron persoas da rúa as que deron a cara polo galego, e os protagonistas da campaña teñen nome e apelidos. Chefa Pérez, Ramón Rodríguez, Tino Miranda, Marta Aido, Antonio Lijó, Cipriano Pose, Ramiro Ouviña, Manola Fungueiriño, Valentina Agrelo e Sonia Yáñez prestaron a súa imaxe a aportaron as súas opinións para reivindicar o uso do idioma autóctono en todos os ámbitos.

As rusas tamén en galego

2010-05-28T08:36:00.000-07:00

Da creatividade (multipremiada) do CEIP Aguiño.

Desequilibrio e agresión

2010-05-22T14:21:00.000-07:00

Máis respostas á aprobación do Decreto do Plurilingüismo.

A Coordinadora Galega de ENDL entende que este novo regulamento acentúa o desequilibrio entre as linguas oficiais, propiciará a inmersión en castelán en infantil e non garante que o alumnado acade a competencia en lingua galega ao rematar o ensino obrigatorio, tal e como procura a lexislación educativa en materia lingüística.
Non é certo que exista equilibrio entre galego e castelán, idea coa que o goberno pretende vender o novo texto lexislativo. O galego, lingua propia de Galicia e necesitada de protección, queda nunha situación moi inferior ao castelán no ensino. As razóns son varias, destacando tres principais:

en realidade hai máis materias marcadas como obrigatorias en castelán ca en galego. Por exemplo, en 3º da ESO falamos de 8 horas semanais de materias que se deben impartir obrigatoriamente en castelán: Matemáticas (4h), Física e Química (2h) e Tecnoloxías (2h); fronte ás 5 horas en galego: Ciencias Sociais, Xeografía e Historia (3h) e Bioloxía e Xeoloxía (2h). No resto das materias, é imposible chegar ao 50% do ensino en lingua galega porque non existen materiais de todo tipo editados nesta lingua para poder traballar nas aulas, escenario que se reproduce en todas as etapas educativas.
a consulta ás familias, que agora se publicita como “pregunta vinculante”, en Infantil propiciará a inmersión en castelán pois, como sinalan os últimos estudos, o galego xa non é a lingua maioritaria nas franxas de idade máis novas. O novo decreto non contempla ningún tipo de medidas tendentes a sentar as bases da adquisición da lingua non predominante na aula.
como persoal docente que somos os membros dos equipos de normalización e dinamización lingüística, e polo tanto coñecedores da realidade sociolingüística dos centros de ensino, consideramos un síntoma moi significativo do afastada que está a Consellería de Educación desa realidade o feito de que se pretenda mudar o noso nome por Equipos de dinamización, como se xa non fose preciso "normalizar" unha lingua coma o galego nos centros escolares, lingua que 27 anos despois de aprobada a Lei de Normalización Lingüística está moi lonxe de acadar unha situación normal na nosa sociedade.

Desde a coordinadora de ENDL pretendemos que o alumnado, o profesorado, as nais e os pais e o resto da sociedade teña competencia tamén en lingua galega, por iso somos conscientes da necesidade de apoio que precisa o galego en todos o ámbitos en xeral e, moi especialmente, no ensino.

Para Prolingua, consúmase a agresión teimosamente preparada contra a lingua galega no ámbito educativo, a peor desde o franquismo, medida que evidencia a vontade de desfacer os tímidos avances normalizadores do período constitucional.

Pola súa parte, as ANPAs dos centros públicos advirten de que a nova norma sería anticonstitucional, pois a Constitución deixa ben claro que a consulta ás familias é totalmente inviable. Ademais, a súa aprobación dificultará a garantía da competencia do alumnado en ambas as linguas oficiais e piden que se suprima que os alumnos poidan contestar no idioma que queiran durante as clases.

Eu, tamén en galego

2010-05-22T10:39:00.000-07:00

Esta Coordinadora acaba de presentar a campaña Eu, tamén en galego, difundida a través de carteis e protagonizada por veciños e veciñas do Barbanza cunha traxectoria profesional e social recoñecida.
Todas estas persoas, representantes de moi distintos ámbitos e traballos (un mariño mercante, unha traballadora social, un xuíz, unha pasteleira...), animan ao uso normal, desprexuizado, da lingua. O galego séntalle ben a todo o mundo, Eu tamén poño copas en galego ou Non se pode cuestionar, falar galego é natural, son algunhas das mensaxes que acompañan as súas imaxes.

Na Voz de Galicia.

Unha campaña que conecta coa da Coordinadora Galega Orgullos@s do noso, orgullos@s do galego, que non para de enriquecerse. Entre as últimas achegas, esta peza orgullosa de Aid:

A cidadanía burlada e a Lei de Normalización ameazada

2010-05-20T08:26:00.000-07:00

O Consello da Xunta aprobou o Decreto de Plurilingüismo tres día despois da macromanifestación a prol da lingua, tras xogar cun pacto imposíbel, sen facer público o texto definitivo e advertindo de que mutilará a Lei de Normalización Lingüística.
A versión oficial, obscena.

Ante isto, Queremos Galego considera que a Xunta actúa con prepotencia na súa imposición unilateral do Decretazo e lamenta que Núñez Feijóo se manteña sen escoitar o clamor social contra a súa política galegófoba. "Debería escoitar os sindicatos, as asociacións de nais e pais, as organizacións estudantís, o Consello da Cultura, a Real Academia Galega e o Consello Consultivo”, subliñan, pois “esta política de ataques contra o galego e de confrontación social non pode levar a nada bo para ninguén”.
Desde Queremos Galego sinalan que as liñas xerais sinaladas esta mañá polo presidente da Xunta para o decretazo “conculcan a Constitución, o Estatuto, a Carta europea das linguas e a Lei de normalización lingüística”. “Se alguén o dubida, só ten que ler o informe elaborado polo Consello Consultivo, que desautoriza punto por punto todos os piares do decretazo contra o galego”, observan.
Como exemplo, na plataforma citan un fragmento do relatorio xurídico onde o Consultivo lembra que “a acción normalizadora da lingua propia ten que implicar, necesariamente, a adopción de accións e medidas de apoio singularizado ou reforzado para garantir a subsistencia e desenvolvemento desta lingua”, algo do que “carece totalmente o decretazo contra o galego”.

A Mesa, pola súa parte, tamén lamenta que o PP queira mudar unilateralmente a Lei de normalización lingüística e lembra que o decretazo presentado hoxe conculca a Constitución e o Estatuto.
A Mesa considera “moi preocupante” que o presidente da Xunta, “en lugar de avanzar no camiño do diálogo e do consenso, botase esta mañá aínda máis leña ao lume, propondo a aprobación unilateral dunha nova norma que derrogue o estabelecido na Lei de normalización lingüística sobre promoción do galego no ensino”. O presidente da entidade advirte de que “derrogar a Lei de normalización, que foi aprobada por unanimidade no Parlamento en 1983, significaría romper un dos piares da Autonomía”.
Carlos Callón considera “máis que lamentábel” que o presidente da Xunta “continúe na tónica de mentir e crispar”. “Calquera persoa que lea o informe do Consello Consultivo verá que non só rexeita a pseudoconsulta en infantil, senón que bota por terra todos e cada un dos alicerces do decretazo” e avalía que “as liñas xerais que presentou hoxe o presidente da Xunta conculcan a Constitución e o Estatuto, porque con esa formulación é inviábel garantir que os rapaces e as rapazas finalicen cada etapa educativa con destrezas comunicativas tamén en galego”.
O presidente da Mesa tamén sinalou que “aínda que o decretazo fala dun 50% de materias sinaladas para impartir en castelán e 50% para impartir en galego, a verdade é que o peso horario desas materias en español é superior, polo que non hai equilibrio nin desde ese punto de vista”. Ademais, lembrou que “Galiza é a única comunidade do Estado español na que se quere prohibir por decreto que se poidan impartir algunhas materias na lingua propia, algo que non acontece nin tan sequera noutros lugares onde goberna o PP”.
“O PP quere ignorar o demoledor informe do Consello Consultivo en aspectos centrais, como a obriga constitucional e estatutaria de promover a lingua propia, polo que este decretazo nace xuridicamente morto”, conclúe.

Día das Letras, Día de Internet

2010-05-16T16:07:00.000-07:00

De Tecnoloxía.org

Do Courel a Compostela

2010-05-14T14:22:00.000-07:00

Contundente ditame do Consello Consultivo ante o Decreto

2010-05-14T13:08:00.000-07:00

O Consello Consultivo considera o Decreto para o plurilingüismo no seu ditame “contrario ao ordenamento xurídico". Esta postura súmase ás desautorizacións (desoídas pola administración) da Mesa Sectorial do Ensino, do Consello Escolar de Galicia, do Consello da Cultura, da Real Academia e das Universidades, entre outras entidades de referencia.

Velaquí algúns fragmentos significativos:

Someter a configuración dun dereito fundamental a votación, con deixación da función de programación xeral do ensino que compete aos poderes públicos, infrinxe os devanditos preceptos constitucionais. (...) Xustamente, porque é responsabilidade das administracións educativas a realización dunha adecuada programación do ensino, e por constituír a dita tarefa unha garantía básica do dereito á educación, é polo que resulta indispoñible, irrenunciable e indelegable tal responsabilidade, en virtude do cal constitucionalmente non é admisible que a programación do ensino quede, total ou parcialmente, a disposición da vontade exclusiva dos particulares, neste caso, das familias.(...) En definitiva, no noso ordenamento non ten acollida un modelo como o proposto, no que a responsabilidade da elección do idioma no ensino, ou a distribución das materias troncais entre os dous idiomas, galego e castelán, recaia, sequera en parte, nas familias, con abdicación da responsabilidade educativa que o artigo 27 da CE atribúe aos poderes públicos, de xeito que a proxectada regulación se sitúa, no aspecto que nos ocupa, fóra do edificio organizativo que para a programación educativa deseña a referida Lei orgánica.

A atribución de ata un terzo como máximo á impartición de materias en lingua estranxeira pode supoñer un sacrificio para a aprendizaxe tanto oral coma escrita das linguas oficiais, tendo en conta os mandatos e fins tanto do Estatuto de Autonomía de Galicia coma da Lei de normalización lingüística sobre a normalización da lingua galega no ensino e da Carta Europea de Linguas Rexionais e Minoritarias, que establece que unha parte substancial da educación se faga na lingua minoritaria (…)

Hase dicir que os principios de elaboración dunha norma regulamentaria, como é un decreto, non poden ser outros ca os da Lei que esta desenvolve, e que no caso que nos atopamos se refiren á Lei de normalización lingüística de Galicia. A formulación contida neste apartado 1, ao referirse unicamente á "adquisición dunha competencia semellante nas dúas linguas oficiais", deixa fóra do seu enunciado esa mentada expresión realizada de seguido na exposición de motivos da Lei sobre "asegurar a normalización do galego", ademais de principios contidos nos preceptos concretos da Lei respecto do ensino (artigos 12, 13 e 14) como un dos eidos de procura da tal normalización;(...) Doutra banda, utilízase a palabra "semellante" no canto de "en igualdade", sendo así que non significan o mesmo, e non se formula na perspectiva na que o fai a lei, que é a de que nunha evidente situación de desigualdade entre as linguas se promova que a máis atrasada alcance o nivel da máis adiantada.

Considérase que ese número 1 do artigo devén legalmente insuficiente, ao tratar de formular principios como base para a interpretación axeitada dos concretos preceptos desta norma regulamentaria, que está desenvolvendo outra de superior rango, polo que debe facelo coa maior fidelidade posible a ela. Por conseguinte, debería reformularse, nos termos xa indicados, ou sexa, recollendo os principios sinalados a respecto diso na Lei de normalización: "asegurar a normalización do galego"; "promover o uso progresivo do galego no ensino"; e que "ao remate dos ciclos en que o ensino do galego é obrigatorio os alumnos coñezan este, nos seus niveis oral e escrito, en igualdade ca castelán". (…) Utilízase no texto o termo "equilibrio", senda mellor empregar o termo de uso xeral "igualdade", que permite saber ao xurista de que se está realmente a falar; isto é, que no caso do principio de igualdade saiban tratar da mesma maneira as situacións iguais e de xeito diferenciado as desiguais; e isto precisamente para tentar de lograr ao final un resultado de igualdade para estas.

Alén diso, o voto particular de GONZALO DE LA HUERGA fai fincapé no carácter contrario á lei da atribución ao galego de topes máximos, non de final a conseguir, senón de medios a empregar (horas e materias), confundindo medios e fins, co que se impide a pontenciación do galego para acadar a igualdade; tamén se subliñan as graves consecuencias da concesión ao alumnado da potestade de non usar como vehicular a lingua na que se está a impartir a materia.

O ditame completo
Análise n'A Nosa Terra

O que vai supoñer o decreto

2010-05-13T10:39:00.000-07:00

Publicación da Coordinadora Galega de ENDL

[presentación emerxente se deixas que cargue o blogue ao completo]

O Consello Consultivo observa dúbidas de legalidade no Decreto "do Plurilingüismo"

2010-05-13T08:22:00.000-07:00

O ditame do Consello Consultivo sobre o decreto do plurilingüismo no ensino, que a Xunta pretende que entre en vigor o próximo curso 2010-2011, observa 'dúbidas de legalidade' e chega a expor puntos de posíbel 'ilegalidade' en que, a través de consultas, se lle traslade aos pais a potestade de elixir a lingua en que se imparten determinadas materias.

Segundo informaron a Europa Press fontes coñecedoras do ditame, o documento elaborado polo Consultivo está formado por "dúas partes", unha delas "bastante dura" que se refire a aspectos de "ilegalidade" e unha segunda parte na que se indican "algúns elementos de reforma a considerar" e que achega suxestións que pretenden mellorar o texto, pero moitas están centradas en cuestións menores.

Segundo as fontes consultadas sobre o ditame, que o órgano consultivo lle remitiu onte á Xunta, o seu pronunciamiento é "duro" respecto da consulta vinculante aos pais, que poderían cambiar a asignación lingüística estabelecida por decreto a condición de que o decidisen a metade máis un do censo de familias con alumnos en idade escolar.

Pola súa banda, o ditame inclúe dous votos particulares, un dos cales se pronuncia a favor da legalidade do decreto e outro que vai máis aló das críticas do propio texto e que reproba o precepto de que os alumnos poderán expresarse na lingua da súa preferencia no aula. Este aspecto foi un dos que xerou polémica sobre o proxecto de decreto presentado pola Xunta.

Elección das familias

A primeira parte do texto incide "na capacidade de elección por parte dos pais" e considera "que non se pode trasladar esa responsabilidade" ás familias, "nin delegar" cuestións que afectan a servizos básicos como "o dereito á educación", polo que advirte aspectos de "ilegalidade".

Precisamente, o borrador de decreto prevé que a Xunta realizará cada catro anos unha consulta ás familias dos alumnos que cursan primaria e secundaria, a través da cal poderán opinar sobre a asignación lingüística establecida pola norma para as materias troncais, co que poderían modificar a atribución no caso de que o decida "a maioría" do total de pais.

A Consellaría non atende a razóns

O secretario xeral de Política Lingüística, Anxo Lorenzo, ratificou que a Xunta mantén 'o mesmo calendario' para o decreto do galego, de forma que entrará en vigor o próximo curso 2010-2011, aínda que analiza elementos 'susceptíbeis' de incorporar do ditame do Consello Consultivo.

Lorenzo indicou que avalían "a recomendacións e observacións" do Consello Consultivo "para incorporalas ou telas en conta na redacción do decreto do plurilingüismo que publicará o Goberno". No entanto, descartou que o pronunciamento do órgano consultivo de Galiza provoque algún atraso no decreto e ratificouse en que estará "vixente en setembro".

En calquera caso, Lorenzo aprazou calquera pronunciamento porque a Xunta adoptará unha decisión "nos próximos días" e evitou avaliar os puntos de ilegalidade aos que alude o ditame do citado órgano. En todo caso, afirmou que "é unha valoración por parte do Consello Consultivo que está para iso, para facer unha valoración xurídica".

Fonte
Máis información, na páxina da CTNL.

A forza do amor en días de chuvia

2010-05-13T07:12:00.000-07:00

A marcha e concerto do Correlingua do Barbanza, o punto culminante dun proceso sociocreativo coa lingua, non puido contar -por mor do tempo chuvioso- máis que co alumnado de Secundaria. Así e todo, en Rianxo viviuse a festa do galego.

Da Biblio Fernando Blanco

O Diario de Arousa recolleuno así:

Estivo a piques de non celebrarse por mor da adversa meteoroloxía, pero ao final o Correlingua do Barbanza en Rianxo desenvolveuse o programa previsto unicamente para os arredor de oitocentos alumnos dos centros de Educación Secundaria da comarca. A forza do amor polo galego ou o feito de que o galego sexa a forza do noso amor fixo que os escolares saíran a correr -ou camiñar- polas rúas rianxeiras máis senlleiras, nalgunhas das cales se sitúan as casas de escritores ilustres como Castelao, Rafael Dieste ou Manuel Antonio ou que levan o seu nome.
Botouse en falta a implicación e a nota de cor que sempre lle dan os máis cativos a este tipo de festas, neste caso a prol da defensa da lingua, cos traballos, murais, pancartas e debuxos que fan nas xornadas previas e que exhiben con orgullo durante a carreira e tamén mentres presencian as diversas actuacións. Pero, foron os directores e mestres dos centro de Educación Infantil e Primaria os que decidiron que, finalmente, os 2.100 nenos dos seus centros non saíran cara a praza Castelao.
Minutos antes de iniciarse a carreira de dous kilómetros desde a dita praza cara á de Rafael Dieste, Tanxil, Xogo dos Bolos, Fincheira, Arcos Moldes e Rosalía de Castro e regreso ao punto de partida polo Campo de Arriba, caeu un chuvieiro. Os rapaces e mestres buscaron onde refuxiarse, aínda que non había moito espazo para iso. Foi entón, cando un hostaleiro despregou a carpa da súa terraza para permitir que moitos deles non se mollasen.
Durante a hora e media seguinte asistiron nun principio á actuación dos reguefeiros Pinto e Caruncho, que non deixaron títere con cabeza meténdose primeiro entre eles e logo con todo aquel que estaba pola Praza de Castelao. De feito, a un dos alumnos sacoulle parecido co presidente norteamericano, Barak Obama, máis que nada pola cor da pel.
Entre medias, Lidia González, María Losada e Carlos Pérez, alumnos do instituto anfitrión, o Félix Muriel de Rianxo, encargáronse de ler un manifesto en defensa a lingua galega en nome do “equipo do Correlingua” cunha mensaxe moi dura cara aos lexisladores, como que pretenden facernos regresar á Ditadura. Non faltaron ás críticas ao presidente da Xunta, que “co seu decretazo pretende facernos memos vendéndonos trilingüismo para evitar o galego”. Engadiron que “o xogo non será nada fácil, os adversarios son traidores, pero temos xuventude, somos moitos, somos fortes, xogamos no noso campo e temos como adestradores a Pondal, a Rosalía, a Daniel e Airas Nunes”.

Imaxes, na Tabarra Dixital.

Correlingua no Barbanza. Este curso o evento será en Rianxo.

2010-05-09T09:24:00.000-07:00

Este será o percorrido:
CORRELINGUA
Data: Luns 10 de maio, 2010
Lema: “Galego: a forza do noso amor”
Horarios
10:00-10:15 Hora de ir chegando. Os autobuses aparcan na explanada do peirao.
Os da ESO van colgar as pancartas á praza de Castealo e despois diríxense á praza de Rafael Dieste.(Praza da igrexa)
10:15 Os de Primaria e Infantil van para a PRAZA DE CASTELAO e a esta hora empeza a actuación de Pinto e Caruncho para EP e EI no palco da praza Castelao.
11:00 ESO sae para a carreira desde a PRAZA DE RAFAEL DIESTE
11:10 E. Infantil sae para a carreira desde a PRAZA DE CASTELAO
11:15 E. Primaria sae para a carreira desde a PRAZA DE CASTELAO
E.I. e E.P. colocan as pancartas cando cheguen da carreira á praza Castelao. (Tamén temos a posibilidade de que colguen as pancartas antes de saír para a carreira).
11:45 Lectura do manifesto na praza Castelao (todos)
12:00 Actuación de Pinto e Caruncho para a ESO na praza de Rafael Dieste
12:00 Actuación de Fantoche Baj para Infantil e Primaria na praza Castelao
13:00 Actuación do Cantalingua para ESO na praza R.Dieste
Colocación das pancartas:
ESO : Cando cheguen, colocarían a pancarta na praza Castelao e despois irían para a praza de Rafael Dieste para prepararse para a saída da carreira.
EI e EP: cando cheguen da carreira á praza Castelao.
Colócanse nunha rede, utilizando pinzas, no muro que divide o campo de abaixo do campo de arriba.
Percorridos:
ESO : Saen da praza de Rafael Dieste (Praza da Igrexa) hacia Tanxil – xogo dos bolos – Fincheira - Arcos Moldes – Rosalía de Castro – Praza de Castelao.
E.Primaria: Saen da Praza de Castelao - Rúa de abaixo - Praza de R.Dieste - Consistorio Vello – Praciña - A fonte - Río de Sima – Lavadoiro - O Adro - Rúa de Arriba - Rúa do Medio - Rúa de Abaixo e Praza de Castelao.
E. Infantil: Saen da Praza de Castelao - Rúa de abaixo - Rúa do Medio - Rúa de arriba - Rúa do medio outra vez – Praza de Castelao.

Para mirar os mapas: Bico da Ría

La voz de Galicia.
Correlingua.

NOTA DE PRENSA DO CEIP DE AGUIÑO:

2010-05-01T11:50:00.000-07:00

O Consello Escolar do Colexio Público de Aguiño, onde está representada toda a Comunidade Educativa: Equipo Directivo, profesorado e familias, denuncia que, por parte da Secretaría Xeral de Política Lingüística, este curso suprimiunos a maior parte da axuda que recibíamos para potenciar o uso e valoración do galego a través de distintas actividades. Concretamente baixaron a axuda de 2500 euros a 833 euros, o que implica tan so unha media de 4 euros por alumno/a frente ós 12.5 euros dos que gozábamos en cursos pasados. O recorte de gastos en Educación afecta á calidade dos distintos procesos de ensino-aprendizaxe do noso alumnado. Este recorte xunto co Decreto do Plurilingüísmo é outra das actuacións da Consellería en contra da potenciación da nosa lingua. Esta medida deixa ó Colexio Público de Aguiño nunha situación de precariedade no ámbito lingüístico.

A Voz de Galicia.

Certo.

Galicia Hoxe.

A Xunta de Galicia discrimina cun 35% menos aos Equipos de Normalización e Dinamización Lingüística da Comarca do Barbanza

2010-05-01T11:45:00.000-07:00

Na concesión de axudas para o ano 2010 o goberno galego deixa os Equipos de Normalización e Dinamización Lingüística da Comarca do Barbanza cun 35% menos de orzamento que o ano pasado.

A pasada semana fíxose pública a concesión de axudas para o desenvolvemeto de actividades nos centros públicos por parte dos Equipos de normalización e Dinamización Lingüística galegos polo que a Coordinadora de ENDL do Barbanza quere manifestar o seguinte:

1.Parécenos totalmente inadecuado que se concedan estas axudas no mes de abril, cando quedan apenas dous meses para o remate do curso, o que provocou que a actividade dos ENDL estivese practicamente paralizada durante todo o curso.
2.Se a reducción da contía das axudas (nun 20%) xa era o suficientemente importante, constatamos como se discrimina aínda máis aos ENDL da comarca do Barbanza que reciben axudas dun 35% menos. Estas cantidades farán que se impida a relización de actividades de carácter cultural e lingüísico, que se deixen de editar materiais, revistas etc que tiñan unha longa traxectoria nos nosos centros e excepcional recepción entre o alumnado e as familias.
3.Tendo en conta os dous puntos anteriores, consideramos que se está prexudicar gravemente o ensino público e, polo tanto, que se está a deteriorar dunha maneira evidente a calidade do ensino.
4.Desde a Coordinadora de ENDL facemos un chamamento ao diálogo e á negociación para evitar que a Consellería non continúe por este camiño de discriminación do ensino público porque prexudicar os nenos e nenas é prexudicar o futuro da nosa sociedade.
(Engadimos noutro documento unha táboa comparativa onde poden ver as cantidades concedidas aos ENDL do Barbanza, segundo os datos oficiais da Consellería de Educación)
Información axudas 2009.
Información axudas 2010.

Vicent Miralles: 'A inmersión é o único que garante o bilingüismo'

2010-03-22T13:14:00.000-07:00

Vicent Miralles Martí é profesor do Departament de Didàctica de la Llengua i la Literatura da Universitat de Valencia, na que ocupou a Dirección do Servei de Normalització Lingüística. Ademais de traballar na Escola de Magisteri, é membro da Mesa per l'Ensenyament, unha plataforma a prol do valenciano. Defensor da inmersión –'que vén sendo o mesmo que se aplica nos colexios bilingües español-inglés, onde ninguén protesta'– rexeita o anteproxecto do decreto que reduce o uso do galego no ensino. Miralles explica nesta entrevista o emprego da lingua na educación nun país que 'apoia plenamente que se impartan materias como Bioloxía Molecular en valenciano'.

[...]os negacionistas rexeitan a inmersión...

A inmersión é unha palabra asociada a termos negativos. Os negacionistas vincúlana coa imposición. Porén, a sociedade valenciá apenas emprega esta falacia, xa que se decatan de que os pais e nais reclaman a inmersión. Realmente, é o mesmo modelo que se aplica nos coñecidos como colexios bilingües que abundan en Madrid. Nestes centros, ben sexa coa dicotomía francés-español, inglés-español, úsase a inmersión e ninguén protesta. A inmersión é simplemente un sistema de facilidade para que os nenos e nenas activen a competencia en varias linguas, máis nada. Con todo, cando este modelo se aplica aos distintos idiomas que existen no Estado español dáselle a volta ao concepto e cárgase de prexuízos que non teñen razón de ser.

Coa súa experiencia no ensino valenciano, como ve anteproxecto de decreto que vén de presentar a Xunta e que reduce o uso do galego?

A pesar de que por motivos persoais visito Galiza con frecuencia, non deixo de ser un “forasteiro”. Con todo, vexo este decreto con preocupación, xa que o galego partía dunha moi boa situación e foi perdendo posicións respecto ao español. Paréceme que o PP está a xogar en Galiza ao que xogou en Valencia cos tres terzos en galego, español e inglés. Alí quixeron impartir Educación á Cidadanía en inglés co obxectivo de que ningún rapaz entendese nada nas clases.

Que lectura fai dos cambios que prevé introducir o PP con esta nova norma?

En primeiro lugar, haberá moitos nenos que até os seis anos non terán ningún tipo de contacto co galego. Na educación infantil perderase un espazo de ouro para activar as competencias lingüísticas dos cativos nas dúas linguas. En segundo lugar, considero que a participación dos pais é un erro e unha grande irresponsabilidade por parte do Goberno, xa que suporá un grave conflito entre as familias. E as culpas non van recaer sobre os políticos, senón sobre as costas da lingua galega, que se vai ver desprestixiada. Por último, a determinación das materias en galego e castelán non me parece inocente. O PP está a vincular o español co progreso e co avance ao ser a lingua vehicular de Matemáticas, Física, Química... Pola contra, pretende usar o galego só para tratar os aspectos propios do país e do antigo, ao ser a lingua na que se impartirá a Historia, Coñecemento do Medio...

Fala de conflito en relación ao idioma...

A conflitivización da lingua é algo preocupante. Nós vivímolo hai 20 anos, pero estamos en camiño de corrixilo. Con este novo decreto, o Goberno obvia que o obxectivo do sistema educativo debe ser que os escolares sexan competentes nas dúas linguas, e para isto cómpre primar o galego. Se os nenos que viven en contornos castelanfalantes non atopan o seu propio idioma no ensino, onde o van atopar? As linguas non se adquiren por arte de maxia e é a escola o ámbito natural para aprendelas. Tanto na Comunitat Valenciana como en Euskadi advertimos que unicamente eran bilingües os falantes da lingua minoritaria e grazas á inmersión agora tamén comezan a ser bilingües os que falan a lingua maioritaria.

A entrevista enteira n'A Nosa Terra.
Crédito da imaxe

O anteproxecto do decreto afonda nos prexuízos cara ao galego

2010-03-15T12:18:00.000-07:00

O novo decreto non garantirá o equilibrio efectivo entre as dúas linguas oficiais no ensino e desprotexe o galego, especialmente na etapa de infantil.

O avance do anteproxecto relega a promoción da lingua galega ás actividades de fomento e ao compromiso persoal do profesorado.

A Coordinadora Galega de ENDL valora negativamente que o Anteproxecto do Decreto do Plurilingüismo non desenvolva os preceptos da Lei de Normalización Lingüística (LNL) como si facían os decretos anteriores. Así, unha lexislación que debería desenvolver a LNL, creada para protexer a lingua propia de Galicia que está en situación de desequilibrio social respecto do castelán, ponlle límites á súa normalización no ensino: por un lado, establece máximos na distribución horaria para o galego cando nunca se cumpriron os mínimos marcados nos Decretos 247/1995 e 124/2007; e, por outro lado, afonda nos prexuízos cara a unha lingua que está en retroceso ao transmitir que non é válida para todos os campos do saber posto que impide que sexa a lingua vehicular para as materias do ámbito científico-tecnolóxico.

Ademais, a Cgendl recalca que non vai garantir o equilibrio entre as linguas oficiais en ningunha das etapas educativas, por iso critica que na ESO se impartan en castelán as materias de Matemáticas, Física e Química e mais Tecnoloxía, con máis presenza horaria que o resto. E denuncia que se discrimine entre materias importantes e de segunda, unha terminoloxía allea ao ensino obrigatorio. Fixando a lingua nas materias consideradas de primeira, a Consellería demostra o seu descoñecemento do proceso pedagóxico e desprestixia socialmente unha serie de materias e a formación e o traballo de milleiros de docentes.

Así mesmo, lamenta que o ensino infantil do galego quede totalmente desprotexido, ao que engade que o pretendido equilibrio entre a dúas linguas non se recolle por ningún lado. Dende a perspectiva pedagóxica, chama a atención que se dea un trato individualizado aos alumnos da lingua non predominante nunha etapa, como a infantil, que se basea nun enfoque integrador das diferenzas.

Finalmente, lamenta profundamente que se traslade a responsabilidade na toma de decisións ás familias e aos centros educativos. Neste sentido, a coordinadora explica que o avance do anteproxecto relega a promoción do galego a actividades de fomento e ao compromiso persoal do profesorado.

Fonte
Documento da CGENDL
Declaración de Prolingua
Postura da CIG-Ensino
Carta aberta a don Anxo Lorenzo (Xabier P. Docampo)
Versión íntegra do decreto

Estudante rianxeira en Madrid, orgullosa de ser galega e de falar galego

2010-03-14T13:35:00.000-07:00

Patricia Neira, ex-alumna do IES Félix Muriel, estuda Fisioterapia en Madrid e ten unhas notas brillantes. Ela relata como o galego non lle supuxo ningún problema nos seus estudos fóra de Galicia, todo o contrario. Escoitádea!

Fonte: O castelo da lúa

O orgúllo espállase

2010-02-25T12:54:00.000-08:00

Unha nova campaña da Coordinadora de Equipos de Normalización, na que interveñen figuras con proxección como Martín Rivas ou Luís Tosar, está a colleitar un éxito sen precedentes. O vídeo Orgullos@s do galego achégase, catro días despois do seu lanzamento, ás 18.000 reproducións no Youtube e máis de 1000 visualizacións directas en Vimeo, que non contabiliza as reproducións embebidas noutros sitios na rede. Tamén está a ter un seguimento importante nas redes sociais con case 2000 seareiros nun grupo en Facebook e máis de 5000 mozos e mozas que participan nun evento no Tuenti.
Alén deste impacto mediático, trátase dunha campaña social: aberta á participación de toda a comunidade educativa, pon á nosa disposición diferentes materiais para imprimir e distribuír, e ademais calquera pode achegar os seus propios.

Esta campaña é túa, esta campaña é de todos e de todas. Colabora connosco e grava un spot, unha breve historia, unha declaración... mostrando o teu orgullo polo noso, o teu orgullo polo galego. Que non sabes como expresalo? A creatividade está dentro de ti. Aí tes o lema, os vídeos, a idea... e dálle voltas, faina túa, falade no colexio ou no instituto, cos profes e cos compas... e mostra o teu orgullo polo noso, o teu orgullo polo galego.

Recollida desta boa recepción n'A Nosa Terra.
Noticia da campaña en Certo.

Velaquí a presentación:

A comunidade educativa do Barbanza mostra o seu rexeitamento ao Borrador do Decreto

2010-02-11T13:18:00.000-08:00

Este mércores, día 10 de febreiro de 2010, a Coordinadora de Equipos de Normalización e Dinamización Lingüística do Barbanza celebrou unha rolda de prensa no IES Nº1 de Ribeira, onde contou co presenza de perto de setenta nais/pais, alumnado e profesorado de centros de infantil, primaria e secundaria (tanto do ensino público, como do concertado) de Rianxo, Boiro, A Pobra e Ribeira.
Na Coordinadora de ENDL do Barbanza indicaron que durante estes últimos meses tiveron multitude de preguntas e queixas polo feito de que desde a Consellería de Educación se quixese facer retroceder a lingua galega no ensino.
Por este motivo a CENDLB quixo que foran directamente os implicados no ensino os que ofreceran o sentir maioritario da comunidade educativa do Barbanza.
No acto interviñeron varios membros de distintos colectivos (ANPAS, alumnado e profesorado) que centraron as súas intervencións nos graves prexuízos contra o galego deste “Borrador” nos seguintes puntos:

-Un retroceso do galego por primeira vez desde que temos democracia, obviando toda a lexislación vixente, incluído o Estatuto de Autonomía que obriga ao goberno galego a protexer e fomentar a nosa lingua.
-O galego non está normalizado, polo tanto está en desigualdade co castelán e só através dunha presenza ampla no ensino (mínimo do 50% das materias) se pode ir cara un maior equilibrio.
-Úsase o introdución do inglés como coartada para facer retroceder o galego, nós non temos nada contra as demais linguas, pero hai outras maneiras de fomentar o plurilingüísmo sen facer retroceder o galego, que a nosa lingua propia e lingua tamén oficial.
-Se se leva a cabo este borrador de decreto, provocará un FRACASO ESCOLAR maior aínda, xa que moitos nenos e nenas non poderán seguir as clases con normalidade
-Ao mesmo tempo provocará moitos conflitos entre familias e docentes, só pola deixación de funcións da administración, que é quen ten que fixar todo o currículo educativo.

Por todo isto, manifestaron unanimemente o rexeitamento da comunidade educativa do Barbanza a este borrador do Decreto e manifestaron o seu desexo de poderen continuar como até agora, pois non tiveran ningún problema coa actual situación.
Imaxes e vídeos do acto:

Así foi recollido o acto por Canal Rías Baixas:

A nova, con máis imaxes, en Certo. Tamén en La Voz de Galicia.

A postura dos Premios á Innovación en Normalización Lingüística

2010-02-07T08:47:00.000-08:00

Os e as representantes dos ENDL que asistiron á Xornada de Formación dos Premios á Innovación en Normalización Lingüística, neste curso 2009-2010, posicionáronse con esta admirábel claridade:

as aulas e o despacho from SonCine on Vimeo.

E, tras a xornada, fixeron pública esta carta ao Secretario Xeral de Política Lingüística:

Os ENDL galardoados nos Premios á Innovación en Normalización Lingüística puxeron en coñecemento do Secretario Xeral de Política Lingüística a carta que reproducimos máis abaixo no trascurso das Xornadas de Formación dos Premios de Innovación en Normalización Lingüística, que tiveron lugar no día de onte, sábado 30, no IES As Fontiñas de Santiago de Compostela.

Señor secretario xeral de Política Lingüística:

Reclamamos a súa atención para unhas breves consideracións que queremos transmitir ao goberno galego e que recollen o noso sentir unánime. O sentido da responsabilidade e o respecto que nos merece a súa persoal traxectoria docente e investigadora serán o contrapeso que nos permita conseguir continencia verbal á hora de lle expresar o noso malestar.

Aínda que para vostede non sexa agradábel escoitar as nosas queixas –e tampouco para nós formulalas-, temos a obriga moral de transmitirllas aquí e agora. Coa máxima cordialidade e co máximo respecto, nesta que debería ser xornada de xúbilo, temos que alzar a nosa voz para clamar contra a involución manifesta (redución do número de premios; dotación económica testemuñal; cambios regresivos na convocatoria de axudas para os equipos de normalización; actitude de desprezo polo patrimonio literario por parte do conselleiro do ramo; e, como colofón, as chamadas Bases do Decreto do Plurilingüismo).

A que era tenue e incipiente normalización nos centros foi posíbel grazas á implicación de profesoras e profesores comprometidos, ás veces para o alumnado os únicos referentes de uso do galego en todos os ámbitos. Con que fin pretenden que este profesorado teña que renunciar á docencia vertebradora? Cal é o fin de que se pretenda responsabilizar do ensino en galego a determinadas persoas sen competencia nin motivación para esta encomenda? A mellor garantía da presenza normalizada do galego no ensino é o profesorado que leva varios anos desenvolvendo en galego a docencia e a vida. Mais este histórico contributo de recuperación da identidade colectiva será cercenado polo marco legal proposto, que acentúa os comportamentos diglósicos e nega a posibilidade de ofrecer ao alumnado modelos de usos lingüísticos normalizados.

Por todo o exposto, os representantes aquí presentes dos Equipos de Normalización Lingüística que están a desenvolver en colexios e institutos proxectos cuxa calidade ten sido recoñecida nos premios de innovación convocados pola Secretaría que vostede dirixe solicitámoslle a retirada destas bases e o mantemento do Decreto en vigor, o que desenvolve as medidas consensuadas no Plan de Normalización da Lingua Galega e o máis axeitado para poder cumprir a tarefa que a propia administración educativa nos encomendou: promover o galego para normalizar o seu uso entre a comunidade educativa, asentando así as bases dun ensino plurilingüe.

Asdo.:

Premios á Innovación en Normalización Lingüística 2009-2010

Equipos de Normalización e Dinamización Lingüística do CEIP Aguiño (Ribeira), CEIP A Gándara (Carballo), CEIP A Pedra (Bueu), CEIP Bergantiños (Carballo), CEIP Quintela (Moaña) IES Menéndez Pidal (A Coruña), IES Sardiñeira (A Coruña), IES Félix Muriel (Rianxo), IES Perdouro (Burela), IES Rodeira (Cangas) e IES Porto do Son (Porto do Son).

Argumentos fronte as mentiras

2010-02-07T06:12:00.000-08:00

Prolingua vén de presentar, en 70 localidades de todo o mundo e con gran éxito, o libro 55 mentiras sobre a lingua galega, que nos achega argumentos claros e sólidos para enfrontar as ideas erróneas, prexuizosas, ideoloxizadas e perversas que se difunden para frear o lexítimo proceso de normalización da lingua galega. Para non ficar sen defensas ante os virus das falacias etnocidas, que negan a historia e a evidente desigualdade económica, mediática, social entre o galego e o castelán, que negan os dereitos de todo un pobo.
Velaquí unha síntese realizada pola profesora Pilar Ponte:

Prolingua 20 Mentiras sobre a lingua galega (2010)

View more presentations from A profa .

A resposta do ensino e de toda a sociedade

2010-01-12T13:22:00.000-08:00

Ante o ataque galegofóbico, antipedagóxico e preconstitucional que supón a proposta, firme, de derrogación do decreto de promoción do galego no ensino, está a ser un clamor a necesidade de dar respostas sociais. Como se mostra nesta ampla recompilación de artigos, análises e posicionamentos, á que cómpre engadir esta contundente opinión de Xavier Vence.
E a primeira desas respostas será a folga xeral do xoves 21. Nunca houbo tantas razóns.

Unha primeira análise do borrador do novo decreto.

2010-01-10T10:50:00.000-08:00

Primeira análise do borrador do novo decreto pola Coordinadora Galega.

O borrador do Decreto do Plurilingüismo para o ensino non universitario non garante que o alumnado acade a competencia lingüística en lingua galega, tal e como fixa a lexislación educativa, acentuando o desequilibrio social existente entre as dúas linguas oficiais.
A proposta traslada aos centros escolares e ás familias un conflito creado por intereses políticos ao presentar un modelo que non se fundamenta en criterios estritamente pedagóxicos e demostra o descoñecemento da realidade dos centros.
A introdución dun idioma estranxeiro como lingua vehicular do ensino establécese sobre bases erradas e distorsiona unha planificación lingüística rigorosa e eficiente que redunde na formación do noso alumnado.

Desde a Coordinadora Galega de ENDL pensamos que a proposta de decreto que regulará as linguas vehiculares no sistema educativo non garante a liberdade dos pais, non busca o equilibrio entre as dúas linguas oficiais, non formula correctamente a introdución do terceiro idioma e non vai conseguir ningún “bilingüismo cordial” senón un conflito nos centros escolares e na sociedade.
1- Nós defendemos unha educación igualitaria, tamén na aprendizaxe das dúas linguas oficiais, nas que o alumnado debe acadar unha competencia lingüística plena ao rematar o ensino obrigatorio. Con todo, a lingua galega non está en igualdade de condicións co castelán e a súa presenza é practicamente nula en multitude de ámbitos da sociedade; polo tanto, é na escola onde a poden aprender. Todos os especialistas din que cun ensino de menos do 50% na lingua minorizada é imposible garantir o seu dominio. Polo tanto, este decreto contén unha clara discriminación cara ao galego.

2. Non se pode falar de liberdade de elección con dúas linguas que xogan en divisións moi diferentes. Tampouco se pode falar de liberdade de elección dos pais cando só se vai respectar a decisión dunha parte. Se non vai haber segregación, medida que rexeitamos, como se respecta a suposta liberdade de elección en educación infantil dos que non saian “gañadores”, aínda que sexa un 49%? Ademais, é nesta etapa na que os nenos e nenas aprenden a falar e teñen os seus primeiros contactos coa lingua escrita, e múltiples estudos demostran que nesas idades son capaces de ir asentando as estruturas gramaticais e adquirindo vocabulario das linguas que se lles ensinan. É, logo, o momento de potenciar a aprendizaxe do galego, que se debe ir reforzando despois durante todo o ensino. Só desde o coñecemento das linguas pode haber liberdade para que poidan usar unha ou outra.

3- É un decreto feito desde o descoñecemento da realidade dos centros educativos. Trátase dunha decisión política e non pedagóxica, que non atende ao que din os especialistas en aprendizaxe de linguas e que obvia a problemática que pode supoñer no funcionamento dun centro educativo. As decisións sobre o currículo tenas que tomar a administración, por iso entendemos que é unha irresponsabilidade do goberno que traslade a decisión sobre a lingua vehicular no ensino ás familias e aos centros educativos. Isto só vai crear un conflito que non existía e imposibilita un ensino integrador e igualitario. Este borrador que supostamente busca o “bilingüismo cordial” parte dun problema que non tiñamos nos centros e a súa elaboración xustifícase en falacias, a primeira “a imposición do galego na escola”.

4- A fórmula para a aprendizaxe de linguas estranxeiras, non oficiais na nosa comunidade, non pode estar supeditada a quitarlle horas ás linguas oficiais, nomeadamente ao galego, que é a que necesita de potenciación. Desde a Coordinadora apostamos polo fortalecemento do ensino de linguas estranxeiras pero tomando as medidas pedagóxicas necesarias e facendo unha planificación seria: reducindo a ratio de alumnado por aula, dotando os centros de aulas de idiomas ben equipadas, aumentando as estadías no estranxeiro para o alumnado e o profesorado, fomentando a súa práctica con lectores nativos, etc. Estas medidas deben ser dirixidas ao conxunto de todo o alumnado posto que o dominio das linguas estranxeiras non pode supeditarse á conxuntura concreta de cada centro. Sería discriminatorio que o nivel de inglés do alumnado dependese da posibilidade de que se puidesen ofertar no seu centro máis ou menos materias en inglés. Ademais, queremos recalcar que os estudos demostran que as comunidades bilingües obteñen mellores resultados que as comunidades monolingües na aprendizaxe das linguas estranxeiras. Polo tanto, o dominio do galego e castelán só tería efectos positivos. A aprendizaxe e a competencia en máis dunha lingua enriquece, porque as linguas suman.

5- Gañar unhas eleccións non lexitima ao goberno para atentar contra o noso patrimonio. A administración ten a obriga de potenciar a lingua propia de Galicia, que se atopa ameazada e non o está cumprindo desde o momento en que se busca limitala no sistema educativo cunha norma que é a máis regresiva de todas as comunidades autónomas con lingua propia. A escola debe buscar un equilibrio para a aprendizaxe das linguas xa que na sociedade non o hai e ese equilibrio pasa por potenciar o galego no sistema educativo.

Feliz 2010 para ti, para os teus... para a nosa lingua

2009-12-16T11:49:00.000-08:00

Para tod@s, para o futuro, da nosa parte, esta felicitación da Coordinadora Galega:

Wiki de materiais en lingua galega

2009-12-16T11:13:00.000-08:00

Acaba de abrirse un espazo colaborativo e aberto a todo o profesorado que intenta darlle resposta a unha necesidade clamorosa: a disposición dun sitio web que faga máis accesíbeis os diversos materiais e recursos de cada unha das áreas didácticas presentes na rede para compartir. Ademais, pretende constituír un punto de encontro no que se refire ás necesidades e usos didácticos, como complemento dos blogues e páxinas docentes.
Iso si, en principio é específico de secundaria, mais pode incorporar outras etapas educativas ou axudar ao nacemento de wikis irmáns. Nós decidimos. Participa!

A CENDLB fai públicos os premios Anticiclón e Borrasca

2009-12-03T00:19:00.000-08:00

A nosa Coordinadora vén de outorgar os premios anuais de normalización na comarca. O Anticiclón, concedido á entidade que máis promove o galego, recaeu no Centro Comercial aberto O Deán, d'A Pobra do Caramiñal, polo uso normal e cotiá do galego nas tendas que o conforman. Pola súa parte, o merecedor do Premio Borrasca foi o Centro Comercial Haley (de Ribeira e outras localidades, pertencente ao Grupo GADISA), que obvia case por completo a nosa lingua, tanto na oralidade coma na escrita, empregando ademais o topónimo deturpado.

Pódese acceder aos comunicados dos premios desde o Posterous do xornal Certo.
A nova na Voz.

O CEIP de Aguiño e o IES Félix Muriel recuncan nos premios aos mellores proxectos de normalización lingüística

2009-12-02T09:47:00.000-08:00

Veñen de resolverse os premios a proxectos de innovación en normalización lingüística, que convocan a Secretaría Xeral de Política Lingüística e mais a Dirección Xeral de Educación, Formación Profesional e Innovación Educativa.
Entre os galardoados este ano están de novo o CEIP Aguiño, de Ribeira, por Mar de mulleres asolagadas e, cun accésit, o IES Félix Muriel, de Rianxo, polo traballo Abrindo portas en galego.
O ENDL de Aguiño é tamén o responsábel de que botase a andar o atractivo proxecto Redeiras, un poemario experimental entre centros.
Parabéns a todos os participantes!

null

Xandre, o elefante sen sombra.

2009-11-28T23:21:00.000-08:00

[O teu navegador non soporta marcos ou neste momento está configurado para non visualizalos. Como alternativa, podes acceder ao contido no seguinte enlace: &amp;lt;a href="http://www.contosdexandre.net/sen_sombra/menu.html" title="Enlace ao conto principal de Xandre." xml:lang="gl" lang="gl"&amp;gt;www.contosdexandre.net/sen_sombra/menu.html&amp;lt;/a&amp;gt;]

Xandre, o elefante sen sombra. (No trianguliño que aparece na parte de abaixo podedes escoitalo)
Cousiñas sobre Xandre.

Cartas útiles

2009-11-19T15:36:00.000-08:00

Na mesma semana na que o Tribunal Supremo rexeitaba que os pais poidan decidir a lingua na que deben ser educados os seus fillos (pois "nin a Constitución nin a Declaración dos Dereitos Humanos facultan os pais para escoller a lingua de estudo dos seus descendentes"), a xustiza española tamén daba mostras de ignorancia e racismo lingüístico ao lle ser retirada a unha viguesa a custodia das súas fillas por motivos lingüísticos. Neste caso, o xuíz entende (!) que sería un prexuízo para elas trasladarse de Madrid a Vigo, onde serían "escolarizadas con inmersión nun sistema escolar en lingua galega (...) que máis alá do ámbito de aquela Comunidade Autónoma, non se apreza que teña outra utilidade práctica".
Diante de flagrantes discriminacións como esta, desde o blogue d'A Mesa da zona de Ourense, chámase ao activismo epistolar, seguindo o magnífico exemplo de Manuel Rivas.

Preocupación ante a parálise dos proxectos de fomento do uso da lingua galega nos centros educativos

2009-11-15T01:18:00.000-08:00

A Secretaría Xeral de Polìtica Lingüística retrasa a convocatoria de axudas para o curso 2009-2010 ata o vindeiro ano prexudicando seriamente o desenvolvemento das actividades de sensiblización, dinamización e capacitación lingüística no ensino

A Coordinadora Galega de ENDL quere mostrar a preocupación e o malestar que están a expresar os Equipos de Normalización e Dinamización Lingüística ante o retraso da convocatoria anual dos Proxectos de Fomento do Uso do Galego nos centros de ensino público e privado.

Precisamente no momento en que os diferentes departamentos didácticos están a elaborar as programacións didácticas que planifican o traballo de todo o curso, a CGENDL constata que desde a DXPL non se van convocar en tempo e forma (a comezos de setembro, como se fixera no curso pasado) as axudas aos proxectos de fomento do uso do galego nos centros de ensino. A súa demora imposibilita a organización de actividades encamiñadas a poñer en valor a lingua galega entre a comunidade educativa así como, especialmente, a desenvolver as capacidades lingüísticas do alumnado.

A organización de ligas de debate, de cursos de expresión oral, de grupos de teatro escolar, de certames artísticos, a publicación de revistas e xornais, a realización de programas de radio e televisión, a formación nas novas tecnoloxías, etc. promoven o traballo das habilidades lingüísticas dun modo lúdico e global redundando na mellora de todas as materias e, polo tanto, da calidade do ensino e da formación do noso alumnado. Desde sempre, os ENDL teñen un papel destacado na programación extraescolar e cultural dos centros educativos polo que a interrupción deste labor tamén afectaría negativamente á súa proxección pública e á súa implicación coas familias e o seu contorno máis inmediato.

Esta situación de parálise suporía un retroceso nas políticas de apoio da administración aos ENDL logo de que en anos anteriores se solventasen por primeira vez moitos dos problemas que obstaculizaban o seu labor (convocatorias desaxustadas cos cursos académicos, falta de directrices de traballo para os equipos, etc.). Esta interrupción dunha dinámica de apoio á dinamización lingüística nos centros educativos conduce á desorientación e ao desánimo de todos os que conforman os equipos: aos centos de docentes, membros do persoal administrativo e, sobre todo, de rapaces e rapazas, principais realizadores e receptores das nosas actividades.

Por todo isto, a Coordinadora Galega de ENDL animará aos ENDL a enviar cartas dirixidas ao Conselleiro de Educación para lle requerir que axilice os prazos dunha convocatoria fundamental para realizar o seu labor nos centros públicos e privados de toda Galicia.

Carta ao Conselleiro de Educación-PDF
Vía:Coordinadora Galega de ENDL

A nosa Coordinadora de Equipos de Normalización Lingüística finalista dos premios Barbantia.

2009-11-07T03:38:00.000-08:00

Barbantia xa ten aos seus finalistas

Dentro de Barbanza ou fóra, pero vencellados á bisbarra, hai nomes que soan a cultura viva, a creación en estado puro. Algúns deles xa foron premiados pola a asociación Barbantia, que está a piques de repartir vos terceiros sirenos de bronce. E outros figuraron entre vos aspirantes a eses galardóns instaurados non 2007. Quizais por iso, porque algúns estiveron entre vos candidatos pero non foron finalmente premiados e porque ou ano pasado as votacións, segundo indicou a entidade, estiveron moi apertadas, decidiuse que as persoas que non 2008 estiveron na terna para ser galardoadas sen finalmente acadar ou premio volvan a figurar entre vos candidatos. A maiores, engádense tres nomes: os de Paola García Paz, ou dá Coordinadora dous Equipos de Normalización Lingüística dá Comarca e ou de Soledad Peralta Lorenzo.
Como ou ano anterior, haberá tres categorías: a de traxectoria cultural non Barbanza, para estimular a labor feita por persoas que centraron a súa obra na comarca; a de iniciativa no Barbanza, pensada para recoñecer ou labor dás entidades barbancesas; e, para rematar, a dá cultura galega, que premia a aquelas persoas nadas na comarca que acadaron prestixio máis aló dás súas fronteiras.
Na primeira sección, na que ou ano pasado se premiou a Manuel Dourado, figuran ou profesor Xoán Mariño Reino, ou músico e compositor Xosé Ramón España, ou mestre e investigador Manuel Mariño do Río e a pintora Paola García Paz. En canto á modalidade que premia ás entidades, cuxo galardón recaeu ou ano pasado non Museo Etnográfico de Artes, este ano compiten ou grupo de teatro Airiños, ou Liceo de Noia, a Casa dá Gramática e a Coordinadora dous Equipos de Normalización Lingüística non Barbanza. Para rematar, en canto ao labor fora dous límites dá bisbarra, que ou ano pasado recoñeceu ou traballo do creador noiés Alfonso Costa, nesta ocasión figuran como candidatos Andrés Torres Queiruga, Xosé Ramón Barreiro Fernández, Xosé Luís Axeitos Agrelo e Soledad Peralta Lorenzo.

Barbantia estalle enviando aos socios as pertinentes cartas informándolles de que ou acto de entrega dúas tres sirenos de bronce terá lugar ou vindeiro venres 27 de novembro non museo Vale-Inclán dá Pobra. Sen embargo, antes desa data, vos socios dá entidade están chamados a votar para que poidan ser elixidos vos tres galardoados. Deberán deixar as súas tarxetas coas súas eleccións non centro social de Boiro antes do día 20 deste mes.
Via: La Voz de Galicia
Páxina da Asociación cultural Barbantia.

Ano Novoneyra

2009-11-01T14:35:00.000-08:00

Comezamos a recompilar no lateral do noso blogue diferentes recursos sobre Uxío Novoneyra, autor fundamental en homenaxe sempre. Con Uxío, "A forza do noso amor, do noso amor á Terra, do amor ó Pobo, do amor ó propio pobo, do amor á Lingua, de todo o que configura a propia nación, non pode ser inútil".

Galicia, será a miña xeración quen te salve?
Irei un día do Courel a Compostela por terras libradas?
Non, a forza do noso amor non pode ser inutle.

Un par de fragmentos seus musicados:

Nel Vidal: Queremos

2009-10-30T08:08:00.000-07:00

Para subscribir, este artigo do presidente da CTNL

Queremos que desde o goberno galego se deixen dunha vez por todas de sementar prexuízos lingüísticos baseados en falsidades como a da imposición lingüística. Queremos...

...unha radio e televisión públicas que apoien decididamente o proceso de normalización da lingua galega en todos os ámbitos. Queremos que a CRTVG cumpra a súa misión estatutaria primordial de servizo público consistente na promoción, difusión e impulso do galego.

Queremos que haxa a garantía de que calquera persoa poida ser atendida en galego na administración. Queremos que as e os aspirantes a traballadoras/es públicas/os en Galiza teñan que demostrar no proceso selectivo a súa competencia práctica para desenvolver o seu traballo na lingua propia deste país, polo tanto, na lingua na que terán que desenvolver o seu traballo na administración.

Queremos software público en galego. Queremos a tradución pública á nosa lingua do software libre e a súa difusión e distribución. Queremos Mancomún.

Queremos que a Xunta lle dedique os recursos económicos necesarios ao proceso de normalización da lingua galega. Queremos que non haxa recortes nos orzamentos para a política lingüística.

Queremos o apoio decidido á creación, difusión e promoción dos produtos e servizos culturais en galego. Queremos Cultur.gal.

Queremos que a música en galego de todos os estilos ocupe espazos primordiais da programación da canle principal da Radio Galega e tamén da televisión pública. Queremos abertos por reformas, extrarradios e lumes na palleira.

Queremos que se respecten os nomes propios das nosas institucións, entidades, consellarías, organismos, concellos, etc.

Queremos poder ler na nosa lingua obras literarias tamén estranxeiras. Queremos, tamén este ano, axudas públicas á tradución.

Queremos que nas escolas infantís as nenas e os nenos poidan xogar e ir aprendendo en galego. Queremos darlles aos nosos fillos e fillas esa oportunidade. Queremos galescolas. Queremos que se retome o programa piloto de liñas de educación infantil en galego fixado no PXNLG e que en anos anteriores tivo unha gran demanda.

Queremos apoio decidido á creación cultural galega; á literatura, ao audiovisual, á música, á comunicación, á cultura tradicional, ás artes escénicas, etc. Queremos premios nacionais da cultura galega.

Queremos escoitar os cargos públicos falar na lingua propia do país e das institucións que representan. Queremos que no exercicio das súas funcións as conselleiras e os conselleiros e demais cargos públicos se expresen normalmente en galego, tanto por escrito como oralmente.

Queremos que o galego non sexa visto desde os poderes públicos como un atranco.

Queremos cinema en galego. Queremos que, cando menos, se siga actualizando e difundindo Foclos.tv, o cineclub do audiovisual galego na rede.

Queremos que se respecten e que non se poñan en dúbida os únicos nomes lexítimos dos nosos lugares, aldeas, parroquias, vilas, concellos e cidades.

Queremos o cumprimento estrito do Decreto 124/2007, polo que se regula o uso e a promoción do galego no sistema educativo e do resto de lexislación vixente.

Queremos que desde as administracións públicas non se financien entidades que teñen como obxectivo a redución do uso –e prestixio– do galego.

Queremos a volta do Partido Popular ao consenso que supuxo o aprobado por unanimidade Plan xeral de normalización da lingua galega, pois os acordos asinados por todos só poden ser substituídos por acordos asinados por todos. Queremos que non haxa nin un só paso atrás. Queremos que os poderes públicos cumpran coa súa obriga e responsabilidade de apoiar o proceso de normalización da lingua galega.

... E os bebés non saben ler subtítulos. Si, tamén queremos Teletubbies en galego.

Queremos respecto...

Queremos Galego!

A Coordinadora Galega de ENDL denuncia o recorte dos recursos destinados ao fomento da lingua galega nos centros de ensino

2009-10-30T07:49:00.000-07:00

A Coordinadora Galega de Equipos de Normalización e Dinamización Lingüística (CGENDL) denuncia o recorte drástico das partidas destinadas ao fomento do uso da lingua galega no ensino non universitario no borrador de orzamentos da Xunta de Galicia para o ano 2010. A CGENDL considera que a redución dun 20% nos proxectos de dinamización e normalización lingüística pon en perigo o desenvolvemento de actividades que teñen como obxectivo desenvolver a competencia lingüística do alumnado e valorar o idioma entre a comunidade e afectará negativamente á proxección pública dos centros escolares e á súa programación extraescolar e cultural.

De se aprobaren estes orzamentos, as programacións desenvolvidas ao longo do curso polos ENDL en colexios e institutos veranse fortemente resentidas e este recorte obrigará á supresión de actividades como a edición de xornais escolares, cursos de alfabetización nas novas tecnoloxías e nos medios audiovisuais, obradoiros de teatro e expresión oral, proxectos de dinamización da lingua no eido local, programas educativos interescolares, etc. Estas iniciativas procuran a mellora das diferentes destrezas lingüísticas do alumnado e mesmo do profesorado e as familias.

A CGENDL sinala que esta medida se suma a outras igualmente preocupantes:

1. o retraso da convocatoria anual das axudas ao fomento do idioma no ensino, que ao se adiar ata xaneiro, no canto de setembro, paralizan de facto a actividade dos equipos.
2. a supresión dos seminarios de formación en dinamización lingüística orientados ao persoal docente, que estiveron cubrindo nos últimos anos a demanda de formación dos profesionais do ámbito.

Na opinión da CGENDL, estas decisións interrompen unha dinámica de apoio á dinamización lingüística nos centros educativos, feito que prexudica a formación do alumnado, destinatario principal das actividades que realizan os Equipos de Normalización e Dinamización Lingüística.

Reaccións desde O Castelo da Lúa

Descobren unha nova modalidade xornalística

2009-10-20T14:43:00.004-07:00

A entrevista-interrogatorio policial.
Mira ti onde, con quen e para que. Nun medio público, pagado por todos e en entredito, con quen escribe ao mesmo tempo que o actual marco normativo para a lingua supón unha imposición da inmersión (!) e coa intención de intentar fender a sensatez en materia lingüística.

Carlos Callón ''entrevistado'' por Carlos Luís Rodríguez

A causa do galego, canción para cantar todos os días

2009-10-19T10:02:00.000-07:00

A histórica, por masiva e plural, manifestación en defensa dos dereitos consensuados para a lingua galega deste 18 de outubro en Santiago de Compostela, está a xerar tamén multitude de documentos na rede, como recolle Vieiros, por exemplo, ademais das fotogalerías dos distintos xornais. Precisamente, Blogues pola lingua fixo un chamamento para compartir material gráfico na web 2.0
Entre todas esas mostras do apoio social a unha política lingüística non devastadora, escollemos aquí dúas, ambas esteadas na voz erguida de Manuel María.

Declaracións de Xurxo Souto:

Mini e Mero interpretan a Manuel María na Quintana:

Mini e Mero na Manifestación de "Queremos Galego!" por Queremos Galego en Vimeo.

Continuemos o canto!

Mobilización cidadá ante as agresións á lingua

2009-10-08T15:52:00.000-07:00

O desmantelamento en materia lingüística e os conseguintes recortes nos nosos dereitos producidos tras o cambio de goberno na Xunta motivaron a creación de diferentes e complementarias plataformas cidadás a prol da defensa e promoción da lingua galega. É o caso de Queremos Galego, constituída por múltiples entidades sociais e persoas a título persoal, e que parte destas tres premisas básicas:

a lingua galega é patrimonio e ferramenta de comunicación do pobo galego, e as institucións públicas deben protexela e promocionala
a normalización lingüística debe ser progresiva, polo que as institucións públicas non deben desprotexer o galego nin reducir a súa presenza
os acordos asinados por unanimidade só poden ser substituídos por acordos nos que a unanimidade siga sendo o criterio; neste sentido, logrouse no seu momento un consenso decisivo que está no fixado no Plan xeral de normalización da lingua galega, aprobado no Parlamento en 2004, e na Carta europea das linguas rexionais ou minoritarias, ratificado por unanimidade polo Congreso en 2001

Esta plataforma convoca unha manifestación para o vindeiro domingo 18 de outubro en Santiago de Compostela.

Recentemente presentouse Prolingua, que ten como obxectivos exclusivos a promoción do galego como lingua propia de Galicia (e das comarcas estremeiras) e a consecución da súa oficialidade real, que pasa por unha presenza normal en ámbitos dos que se mantén practicamente excluída, como a empresa, a xustiza e outros servizos públicos e privados, especialmente os medios de comunicación. Esixe, ademais, que se cumpra de xeito pleno a lexislación existente en materia lingüística e que non se leve a cabo ningunha medida lexislativa que supoña perda de dereitos por parte das galegas e dos galegos a usaren e coñeceren a lingua galega e a facer dela o seu sinal de identidade galega. Velaquí a súa presentación:

Desde Prolingua podemos acceder tamén a un conxunto de artigos e entrevistas na prensa moi recomendábeis.
Así mesmo, achegan opinións e creacións de interese para comprender a situación actual e esta mobilización cidadá cada vez máis ampla blogues como Falantes ou Galego. Patrimonio da humanidade.

A nosa lingua.

2009-07-09T07:20:00.001-07:00

Educación promete contar cos equipos de normalización no deseño do novo decreto.

2009-06-25T21:43:00.000-07:00

Representantes da Coordinadora de Equipos de Normalización e Dinamización Lingüística nos centros escolares achegáronlle á Xunta un decálogo "para o consenso".
A Coordinadora Galega de Equipos de Normalización e Dinamización Lingüística tivo esta cuarta feira unha xuntanza co conselleiro de Educación, Xesús Vázquez, onde lle expresaron a "preocupación" e o "malestar" diante da polémica orixinada arredor da lingua galega no ensino. "Esta polémica é moi negativa para a convivencia nos centros, e polo tanto para a educación en xeral e para a lingua en particular", indican. Ao fío, achegámoslles os dez puntos debatidos pola coordinadora este xoves co conselleiro e en base aos cales os representantes do colectivo solicitaron da Xunta que, como parte "fundamental" do sistema educativo, se lles permita participar na elaboración de "calquera documento que lexisle o uso das linguas no ensino":

1.O marco lexislativo educativo ten que evitar a confrontación na comunidade escolar.

2.O alumnado non pode ser segregado por razón de lingua.

3.Débese garantir a presenza do galego no ensino ao 50% como mínimo para poder acadar a competencia nas dúas linguas cooficiais. Só así o alumnado poderá escoller en liberdade.

4.Téñense que elaborar materiais didácticos, de calidade e actualizados, en lingua galega para todas as materias e todos os ciclos educativos, que suplan as carencias existentes.

5.Hai que ofrecerlle ao profesorado cursos de reciclaxe e capacitación en lingua galega; para isto é imprescindible contar cun programa previo de formación de formadores.

6.Cada centro debe seguir elaborando o seu Proxecto lingüístico, que é a base para que os ENDL desenvolvan as súas funcións unha vez analizada a situación sociolingüística do centro.

7.Decreto de infantil.

A)Nesta etapa débese garantir que o alumnado adquira de forma oral e escrita o coñecemento das dúas linguas oficiais tendo en conta que a lingua minorizada precisa de maior reforzo.

B)Propoñemos que avalíen os resultados das liñas de galego en infantil de cara a manter este programa. Os informes elaborados nestes centros valoran moi positivamente estes proxectos xa que permitiron conseguir que todo o alumnado adquirise a competencia nas dúas linguas oficiais, fose cal fose a lingua inicial dos rapaces e rapazas.

8.Equipos de Normalización e Dinamización.

A)Débense implementar programas de formación en dinamización lingüística para o profesorado interesado.

B)Hai que potenciar as coordinacións intercentros.

C)Téñense que consolidar as funcións das coordinadoras provinciais dependentes da DXPL.

9.A administración debe realizar campañas efectivas de dignificación da lingua, que comecen polo propio goberno da Xunta. A situación do galego é moi delicada, por iso algunhas accións e declaracións realizadas nos últimos tempos cuestionan o labor de recuperación do galego feito ata o momento.

10. Parécenos inadecuado que a enquisa sexa a base dun decreto novo. Esta consulta, tal e como foi realizada, non pode ter ese peso nunha lexislación educativa. En cambio, débense ter en conta conta os diferentes datos sociolingüísticos existentes tirados de estudos elaborados con rigorosidade (MSG, IGE), así como os diferentes Proxectos Sociolingüísticos de Centro realizados nos últimos anos.

Vía: Vieiros

El correo gallego.

Galica Hoxe.

Sempre en Galiza.

2009-06-13T00:52:00.000-07:00

Galicia(4)

View more OpenOffice presentations from calcetin5.

A Xunta retira o programa de inmersión en galego para nenos de infantil de contornas castelánfalantes.

2009-06-12T12:38:00.000-07:00

A Consellería de Educación non convocou a orde de axudas para centros educativos de contornas casteláns falantes que decidan pór en marcha un aula de inmersión en galego na etapa de infantil. Trátase dun programa posto en marcha fai tres anos, e que durante este curso beneficiou a 44 colexios.
Este proxecto experimental que puxo en marcha o bipartito esixe varios requisitos, como son a voluntariedad dos pais (que tiñan que autorizalo), así como o feito de que houbese máis dun aula por curso, para poder escolarizar aos menores cuxos proxenitores non optan por este sistema. Dos 44 centros que participan este curso, 23 son públicos e o resto concertados, e as axudas que reciben oscilan entre os 1.445 euros e os 2.500. Este proxecto comezou no curso 2006-07 en colexios públicos, e no seguinte sumáronse os privados concertados.
Desde a Consellería de Educación explican que non se convoca esta orde de axudas, pero aínda non se tomou a decisión de que facer cos nenos que empezaron xa o programa (é dicir, non haberá axudas para novas aulas, pero está sen definir se as manterán os menores inmersos no proxecto).
Os centros participantes valoran moi positivamente este sistema. Un deles é o María Barbeito, da Coruña. Belén, normalizadora lingüística, asegura que a experiencia está sendo enriquecedora tanto para pais como para alumnos. ela púxose á fronte da primeira aula de inmersión, fai xa tres anos. Naquel momento, había dous nenos gallegohablantes e tres bilingües dun aula de 25. «Agora estamos falando dunha promoción absolutamente bilingüe». Todo isto tendo en conta que hai menores de Colombia, Bolivia, Romanía ou Cataluña, «e precisamente fai pouco, a nai dun alumno boliviano dicía que nunca imaxinou que ou seu fillo tivera tanta soltura falando en galego».
O éxito do proxecto neste colexio tradúcese en que se cando empezou só un aula das tres existentes optou polo ensino en galego, os seguintes anos foron xa dous por curso, o que implica a 125 estudantes de infantil actualmente.
Vía: La Voz de Galicia.

O Departamento de Filoloxía Galega da Universidade de Santiago de Compostela quere facerlle chegar a súa fonda preocupación pola situación da lingua.

2009-06-12T12:23:00.000-07:00

O mundo universitario tampouco é alleo á derrogación do decreto. Este mesmo venres, o Departamento de Filoloxía Galega da Universidade de Santiago de Compostela envioulle unha carta ao presidente da Xunta para manifestarlle a súa fonda preocupación “polas medidas adoptadas ou anunciadas pola Xunta” referentes á lingua galega.

O texto, aprobado por unanimidade, é abertamente crítico coa actitude do Goberno que “sen dúbida está a ter un impacto moi negativo sobre a situación da lingua, que se encontra xa nun grave proceso de retroceso social”. O profesorado de Filoloxía Galega cuestiona a enquisa que prepara a Consellaría de Educación.

A carta insta ao presidente do Goberno a que, cumprindo a lexislación vixente, tome medidas que “aseguren unha presenza importante da lingua galega no ensino, que garantan o dereito dos cidadáns a ser atendidos en galego nas súas relacións coa administración, que eviten a discriminación laboral por usar a lingua galega, e que a leven a ter unha presenza relevante nos medios de comunicación e noutros ámbitos sociais, de xeito que sexa posible vivir en galego, como di un dos obxectivos xerais do Plan Xeral de Normalización aprobado por unanimidade no Parlamento en 2004”.

Segundo puido saber Vieiros, os departamentos das outras dúas universidades do país preparan textos similares aos asinados polos seus compañeiros de Compostela que se darán a coñecer a vindeira semana.

Ofrecémoslle o texto íntegro aprobado polo Departamento de Filoloxía Galega da USC:

O Consello de Departamento de Filoloxía Galega da USC acordou, en reunión que tivo lugar o día 11 de xuño de 2009 na Facultade de Filoloxía, dirixir o seguinte escrito ao Excmo. Sr. Presidente da Xunta de Galicia, e remitir copias á Excma. Sra. Presidenta do Parlamento galego, ao Excmo. Sr. Conselleiro de Educación e Ordenación Universitaria e ao Sr. Secretario Xeral de Política Lingüística:

O Departamento de Filoloxía Galega da Universidade de Santiago de Compostela quere facerlle chegar a súa fonda preocupación pola situación da lingua galega, e en particular polas medidas adoptadas ou anunciadas pola Xunta de Galicia, encamiñadas a desprotexela na función pública e no ensino non universitario, por primeira vez desde a recuperación da democracia, a pesar de estar obrigada pola Lei de Normalización Lingüística a promover de maneira progresiva o seu uso normal de maneira específica neste ámbitos. Con estas medidas, e coas reiteradas declaracións de membros do goberno galego, estáselle transmitindo á cidadanía a idea de que a lingua galega non é nin necesaria nin útil e estanse a reforzar os vellos prexuízos lingüísticos, o que sen dúbida está a ter un impacto moi negativo sobre a situación da lingua, que se encontra xa nun proceso de grave retroceso social.

No tocante ao ensino non universitario, este Departamento considera que a Xunta de Galicia incorre nunha grave responsabilidade ao trasladarlles aos pais e nais decisións que lles corresponden aos poderes públicos, colocando a lingua galega como motivo de división social e creando un conflito que non existía ata o de agora, ademais de poñer en evidente risco o mandato tanto da Lei de Normalización Lingüística coma da Ley Orgánica de Educación de que os alumnos acaden unha competencia lingüística elevada por igual en galego e en castelán.

De acordo coa lexislación vixente, e conforme co seu carácter de lingua oficial de Galicia (xunto co castelán), instamos a que o goberno da Xunta de Galicia tome medidas que aseguren unha presenza importante da lingua galega no ensino, que garantan o dereito dos cidadáns a ser atendidos en galego nas súas relacións coa administración, que eviten a discriminación laboral por usar a lingua galega, e que a leven a ter unha presenza relevante nos medios de comunicación e noutros ámbitos sociais, de maneira que sexa posible vivir en galego, como di un dos obxectivos xerais do Plan de Xeral de Normalización da Lingua Galega aprobado por unanimidade no Parlamento de Galicia en 2004. Animamos tamén ao goberno da Xunta a que xere un clima positivo cara á lingua galega que atenúe e desfaga os prexuízos que contra ela existen aínda na nosa sociedade, como se puxo abertamente de manifesto nos últimos meses.

A lingua galega é unha riqueza e un patrimonio de todos os galegos, calquera que sexa a lingua que falen, parte fundamental do recoñecemento de Galicia como comunidade histórica, e pode ser unha ferramenta de futuro para a nosa sociedade se queremos e sabemos utilizala e desenvolvela. É responsabilidade de todos. E, en primeiro lugar, do Goberno galego, que Vde. preside.
Vía:Vieiros.

O galego é do que o fala, e é tamén do que aínda non o fala, ou do que xa non o fala...

2009-06-12T12:05:00.000-07:00

Manifesto sobre a lingua feito público polo Colexio Oficial de Psicoloxía de Galicia:

"Que imaxe vai ter de si un pobo que deixou apagar, deixou morrer, o máis valioso do seu patrimonio inmaterial?", pregúntanse desde o colexio de psicólogos.

"O galego é meu, o galego é noso, é de todos e todas. O galego é do que o fala, e é tamén do que aínda non o fala, ou do que xa non o fala... O galego é daquel que o ama e mesmo daquel que o odia, se é que hai algunha persoa que tal sinta polo seu patrimonio herdado... Porque, ao final, que é o galego?
O galego é o máis valioso dos nosos tesouros inmateriais, xunto coa música que tamén é outro tesouro. Realmente é difícil ver o valor de certas cousas até que sentimos a súa carencia, a súa falta, cando xa é tarde... Hoxe é tal vez tarde para recuperar a lagoa de Antela, a lagoa que hoxe a ninguén se lle ocorrería desprotexer, mais iso nos anos 50 non se viu. Hoxe é tarde para recuperar o que foi destruído, mais non é tarde para aprender deses erros e protexer o que nos resta.
A ninguén, non seu san xuízo, se lle ocorrería desprotexer a catedral de Santiago, e sen ir tan lonxe, a ninguén se lle ocorrería desprotexer a arte e arquitectura da cidade de pedra compostelá... Mesmo indo contra a suposta liberdade individual dos propietarios e propietarias dos inmóbeis da zona histórica, todos e todas concordamos en que hai que protexer o que é patrimonio común... E a lingua? Acaso a nosa lingua non merece o mesmo que as nosas pedras? Ela é patrimonio de todos e todas nós, e non só... ela é tamén patrimonio de todo o Estado, e da humanidade enteira. Entón, non merece o mesmo esforzo de protección?
Desde este Colexio Profesional queremos tamén advertir da importancia que a integración do pasado ten para o benestar presente e futuro das persoas. Un pobo que, non por vontade, porque se algo demostrou o pobo galego foi aprecio e lealdade á súa lingua é un pobo condenado a non saber quen é... E un pobo, ou unha persoa, que non sabe quen é, non pode contribuír con nada de orixinal ao destino da humanidade. Porque a universalidade do saber non vén da maior ou menor extensión dese coñecemento, senón da profundidade á que somos capaces de chegar co noso saber".
E como di a poeta e psicóloga Concha Rousia, "Quando morren o último falante de uma língua morre um sonho da Humanidade". Porque as linguas son todas obras marabillosas da Humanidade, dignas de seren protexidas, e a nosa non pode ser menos. Polo tanto de nós, dos nosos gobernos, depende pois que ese soño non esmoreza".

Educación prohibe actos informativos sobre as enquisas lingüísticas.

2009-06-11T10:43:00.000-07:00

Educación prohibe actos informativos sobre as enquisas lingüísticas
A consellaría pídelle aos directores que informen á Inspección de calquera campaña nos centros. Os sindicatos consideran que o Goberno quere “amordazar” o profesorado no proceso de reforma do decreto.

“Aproveito para lembrarlle que a Dirección do centro é a responsábel do normal desenvolvemento do proceso de realización da consulta e en consecuencia deberá prohibir todas as accións ou actos, tanto a favor como en contra do mesmo, mantendo informada en todo momento á Inspección Educativa”. Este parágrafo, que figura nunha circular enviada nas últimas horas pola Consellaría de Educación aos centros, está a provocar un considerábel malestar entre o profesorado.

Os sindicatos CIG e o STEG xa arremeteron esta mesma tarde contra unha circular que consideran que busca atemorizar á comunidade docente para que, coincidindo coa chegada das enquisas para mudar o decreto non se implique nunha campaña en prol do galego. O polémico correo chega pouco despois de que sindicatos e colectivos diversos acordaran crear unha fronte comun para reivindicar que o idioma do país non perda terreo nas aulas. De feito, os equipos de normalización lingüística dos colexios públicos e concertados teñen previsto repartir milleiros de folletos informativos para que os pais pidan que, polo menos, a metade das materias se impartan en galego.

A este respecto, dende o STEG afirman que xa teñen consultado o correo cos seus avogados e que o correo electrónico non ten valor legal ningún, xa que vulneraría principios básicos como a liberdade de expresión ou a sindical. Xosé Cabido, membro deste sindicato, é claro: “Isto non ten valor ningún. Todo centro que queira pode seguir adiante coas campañas. Se nalgún momento se intenta prohibir a libre información ou hai accións contra un centro, pódese denunciar porque non é legal”.

Dende a CIG-Ensino son contundentes coa circular: “Facemos un chamamento ao profesorado a que actúe segundo o seu criterio sen deixarse intimidar polas ameazas ilegais dunhas autoridades educativas que perderon o seu carácter institucional para comportarse como axentes electorais dun partido político”

Vía:Vieiros.

De novo: NUNCA MÁIS.

2009-06-10T08:51:00.000-07:00

As linguas suman.

2009-06-09T06:17:00.000-07:00

Co lema "As linguas suman", no documento contextualízase a situación actual segundo a cal, "o idioma que debería unirnos está sendo utilizado para separarnos nunha loita na que algunha xente busca a desaparición da nosa lingua do sistema educativo". O texto artéllase en torno a dúas consideracións: "O galego necesita aprenderse na escola" e "Saber galego axuda a aprender".

Na segunda parte do tríptico, preséntanse algúns datos estatísticos sobre a competencia lingüística do alumnado noutros idiomas que veñen desmontar os prexuízos a respecto deste tema.
Para descargar o tríptico: coordinadora.

Educación pon en marcha a consulta do bilingüismo á carta

2009-06-05T22:32:00.000-07:00

Ten vostede un fillo no ensino non universitario? Tanto se o seu fillo estuda Infantil, Primaria, Secundaria ou Formación Profesional nas vindeiras semanas vai recibir na súa casa un cuestionario, no máis rigoroso estilo bilingüe, con catro preguntas concretas. Basicamente, Educación pregunta en que lingua queren os pais que se impartan as materias troncais, o idioma que prefiren nos libros de texto, en que lingua prefiren os exames e se están a prol de aumentar o número de materias impartidas en inglés. No caso dos alumnos máis pequenos, a Xunta fai unha pregunta sobre cal é o idioma materno dos rapaces.

En total, 330 mil pais recibirán estas enquisas a partir da vindeira semana. O conselleiro, Xesús Vázquez, subliñou que o cuestionario é “o punto de partida” para derrogar o decreto aprobado polo bipartito e que establecía que, como mínimo, o 50% das materias serían impartidas na lingua do país. Vázquez toma o cuestionario como unha especia de referendo xa que considera que servirá para “superar a conflitividade xerada”.

Ten algunha fiabilidade a enquisa?
Son numerosos os expertos, sobre todo do ámbito da sociolingüística, que puxeron en dúbida a rigorosidade dunha consulta deste tipo. Primeiro pola situación diglósica que se vive no país e que indubidabelmente beneficia a supremacía do castelán e segundo polo feito de que se lle pregunte aos pais por esta cuestión en concreto e non por moitas outras que teñen que ver coa escolarización dos seus fillos.

Falta saber o número de pais que van a respostar a esta enquisa. A priori, na propia consellaría pensan que os máis implicados van ser os pais que máis a prol ou en contra están da normalización lingüística. Tamén son moitas as graves dúbidas que hai enriba da mesa: Como se garante que non haxa posibilidade de manipulación dos resultados da enquisa? Polo de agora, nin o propio conselleiro é quen de explicalo.

A caixa de Pandora
Tal como lle adiantamos esta semana, na Consellaría de Educación valorouse a posibilidade de establecer a obrigatoriedade de dúas materias en galego (Sociais e Lingua) e outras dúas en castelán (Matemáticas e Castelán). A partir de aí, cada centro, por medio dos seus consellos escolares, tería unha marxe de decisión.

Dende a Xunta, negaron a noticia asegurando que non hai nada escrito nin se estaba aínda nesa fase do proceso. Porén, diferentes fontes de máxima solvencia consultadas por Vieiros tiñan confirmado que dende Educación foran consultados ao respecto deste modelo como posíbel proposta de solución.

Mais hai quen opina que un dos principais problemas radica no propio PPdeG. As posturas, contra o que poida semellar, non son unánimes. Galicia Bilingüe e dirixentes conservadores da área de Vigo son os que máis presión están a facer para que se lles dea unha ampla marxe de manobra aos pais. Porén, dentro do partido tamén hai voces que consideran que o Goberno está “abrindo unha caixa de Pandora” que pode volvérselle en contra. Este sector apostaba por unha volta ao decreto Fraga, algo que xa quedou descartado pola consellaría.

Vía: Vieiros.

A Coordenadora de ENDL pide a Feijóo que cumpra o Plano de Normalización Lingüística.

2009-05-31T04:47:00.000-07:00

A Coordenadora de ENDL pide a Feijóo que cumpra o Plano de Normalización Lingüística.
A plataforma lembra que aínda non recibiron resposta ás solicitudes de entrevista co presidente da Xunta, o conselleiro de Educación e o secretario xeral de Política Lingüística.
A Coordenadora Galega de Equipos de Normalización e Dinamización Lingüística (ENDL) cualificou hoxe de "preocupantes" os pasos dado polo Goberno galego en relación ao marco legal da lingua galega e reclamou ao presidente Alberto Núñez Feijóo que manteña os compromisos recollido no Plan xeral de Normalización Lingüística de Galiza, "que foi resultado do traballo de centos de persoas, institucións e organizacións e non un simple remuíño de ideas".
Na reunión do consello zonal mantida onte en Santiago de Compostela, representantes de equipos de normalización de todas as comarcas e do ensino púbica e privada recordaron aos responsábeis autonómicos -desde Feijóo ao conselleiro de Educación, e ao secretario xeral de Política Lingüística- que aínda non recibiran resposta ás solicitudes de entrevista.
Neste sentido, sinalan que seguen esperando pese a que "dende o seu nomeamento fixeron un chamamento ao diálogo con todos os sectores implicados non sistema educativo galego co fin de analizar a presenza da lingua galega no ensino". "O consenso constrúese co diálogo", apostillan.
Finalmente, a coordinadora valorou a adhesión de máis de 500 equipos de centros educativos ao manifesto en defensa do decreto do galego na educación que a Xunta vai a derrogar e que a coordenadora considera "unha contribución moi valiosa ao obxectivo recollido na lexislación vixente: dotar ao alumnado galego de competencia nas linguas oficiais".

Vía: GZnacion.

Parachuvias de Galicia. Manifestación Histórica. do 17 de Maio.

2009-05-23T09:26:00.001-07:00

"Disque en Santiago a chuvia é arte. O que é arte son os paraugas. Os paraugas cando combinan e marchan por Compostela. Esvaeceuse na turbulencia histórica o soño dun gran Partido Galeguista. Mais o que temos nestes limiares convulsos do século XXI e unha magnífica ferramenta cívica de marca PG: o Paraugas Galego. Ou o Parachuvias de Galicia."
O Paraugas contra o Apartheid. Manuel Rivas

Chaparróns.

2009-05-23T09:19:00.000-07:00

A lei do 83 prohibe a segregación:
"Os alumnos non poderán ser separados en centros diferentes por razón da lingua. Tamén se evitará, a non ser con carácter excepcional se as necesidades pedagóxicas así o aconsellaren, a separación en aulas diferentes".

Vía:El correo gallego.

Matrícula de Honra para o Correlingua 2009 na Barbanza.

2009-05-13T13:05:00.000-07:00

Máis de dous mil alumnos dos centros de ensino da Barbanza participaron no Correlingua 2009 reivindicando o uso do galego na sociedade.
O Correlingua 2009 chegou a Barbanza baixo o lema “En Galego! Pásao!” coreado por máis dous mil cincocentos alumnos de vinte e seis centros de ensino da comarca, dende o alumnos de Educación Infantil ata Educación Secundaria.
O concello de A Pobra acolleu esta carreira en defensa do idioma galego tomando a testemuña do municipio de Ribeira, que o pasado ano estreou esta iniciativa na bisbarra. Con este acto público lúdico-educativo reivindícase o dereito dos rapaces a coñecer e utilizar o idioma galego.

Acompañados dos seus mestres, os cativos concentráronse na praza Durán Casais, onde un grupo deles deu lectura a un manifesto a través do que demandaron a implicación de toda a sociedade, e concretamente das xeracións máis novas, para manter vivo o uso do galego en todos os eidos. Por iso, dende a Coordinadora dos Equipos de Normalización e Dinaminación Lingüística dos centros de ensino insta ao goberno autonómico a que siga velando pola normalización e promoción do galego na ensinanza.

As actuacións do capitán Benito Souto e a súa grumeta Quilla, a do grupo musical Fantoches Baj e as cancións do cantautor Hugo Torreiro puxeron o punto e final a esta peculiar festa da lingua galega.
Vía: http://www.canalriasbaixas.com/content/view/6578/68/

Eco nos medios:
http://www.lavozdegalicia.com/barbanza/2009/05/09/0003_7705199.htm

http://www.lavozdegalicia.es/barbanza/2009/05/13/0003_7713104.htm

Internet+GALEGO+futuro

2009-05-08T11:55:00.000-07:00

A Consellaría de Economía e Industria vén de abrir a súa páxina na rede para celebrar conxuntamente o Día das Letras e o Día Mundial das Telecomunicacións e da Sociedade da Información.

Podedes ver máis información en www.maisinternetmaisgalego.org, que parte co obxectivo de informar sobre o autor homenaxeado este ano no 17 de maio, Ramón Piñeiro, e tamén sobre todas as actividades que se desenvolvan para difundir e normalizar a nosa lingua, tanto no día a día como a través dos novos medios de comunicación e información que nos brinda a rede de redes.

Preparando o Correlingua nos colexios da Barbanza.

2009-05-06T10:51:00.001-07:00

Visibilizando o noso apoio como profesorado de tódalas etapas educativas.

2009-05-06T10:44:00.000-07:00

MANIFESTO DA COORDINADORA DE
EQUIPOS DE NORMALIZACIÓN E DINAMIZACIÓN LINGÜÍSTICA
APOIO INDIVIDUAL DOCENTES
Enviar adhesións ao fax nº 981800064 ou a través da páxina web
http://www.coordinadoraendl.org/docentes.php
Os Equipos de Normalización e Dinamización Lingüística abaixo asinantes queren manifestar a súa preocupación ante a intención do novo goberno de derrogar o Decreto 124/2007 polo que se regula o uso e promoción do galego no sistema educativo. Como dinamizadores lingüísticos, pero moi especialmente como profesionais do ensino que somos, queremos facer constar o seguinte:
1. Este decreto desenvolve o Plan xeral de normalización da lingua galega, aprobado por unanimidade no Parlamento de Galicia no ano 2004 e elaborado, na parte referida á
educación, por unha comisión na que se integraban representantes das ANPAS, do
profesorado, das organizacións pedagóxicas e das patronais do ensino concertado.
2. Supón a superación dunha lexislación, o Decreto 247/95, que -despois de 12 anos de
aplicación- tiña demostrado que non estaba respondendo aos obxectivos para os que fora deseñada, tal como poñen de manifesto os últimos datos do Mapa Sociolingüístico de Galicia.
3. Persegue como finalidade última que o alumnado acade, ao rematar os seus estudos, unha plena competencia lingüística que o capacite para expresarse oralmente e por escrito nas dúas linguas oficiais de Galicia, no marco dun ensino plurilingüe.
4. Favorece que cada centro elabore o seu propio Proxecto lingüístico, documento que debe ser aprobado polo Consello Escolar e que, polo tanto, require a implicación e o consenso de toda a comunidade educativa: profesorado, alumnado, pais/nais, persoal non docente e representantes dos concellos.
Dado que consideramos as medidas que se establecen no decreto como unha achega importante na tarefa dinamizadora e normalizadora que realizamos nos centros e que non pasou tempo suficiente para avaliar se os seu resultados satisfán os obxectivos para os que foi aprobado, solicitámoslle ao novo goberno que manteña os compromisos acordados pola comunidade educativa e o Parlamento galego no Plan xeral de normalización da lingua galega.

As nosas nenas e nenos...

2009-05-04T10:39:00.000-07:00

Os prexuízos desde Ramón Piñeiro.

2009-05-02T10:46:00.000-07:00

Os PrexuíZos LingüíSticos

View more presentations from ecursocig.

Vía:A tabarra dixital.

Os pais e as nais tamén defenden o decreto do galego

2009-05-02T09:58:00.000-07:00

A Confederación Galega de Asociacións de Pais de Centros Públicos, Confapa, considera “lamentábel” a decisión do novo Goberno galego de derrogar o decreto 124/07 do galego no ensino. “Queremos que ensinen as dúas linguas aos nosos fillos para que cando sexan maiores podan decidir cal delas usan”, afirmou o presidente desta entidade, Virxilio Gantes.
A Confapa representa a maioría dos pais e nais de alumnos en Galiza e ocupa os dous postos do ensino público que lle corresponden aos pais na Mesa Sectorial de Educación. Cómpre ter en conta que dos 1.692 centros que existen no país, 1.325 son de titularidade pública e só 367 privados.
A falta de definición do modelo de ensino respecto ao idioma preocupa na Confapa; tamén é motivo de inquietude a posibilidade de que recaia sobre os pais a responsabilidade de decidir a lingua vehicular na educación. “Iso é un disparate porque non hai aulas nin profesores para que haxa dúas liñas en cada centro, unha en castelán e outra en galego”, sinala Virxilio Gantes, que reclama unha presenza paritaria das dúas linguas, como estabelece o decreto que agora o Goberno pretende derrogar. “Que eu saiba, galego e castelán son idiomas oficiais en Galiza e deben ter o mesmo tratamento; senón, que reformen o Estatuto”, reclamou Gantes.
A Confapa anunciou que lle solicitará ao novo conselleiro de Educación, Xesús Vázquez Abad, celebrar unha reunión para coñecer as posturas da Administración e para que o titular do departamento reciba información da posición que mantén a principal organización que representa os pais de alumnos.
Por outra banda, aínda que o presidente Alberte Núñez Feixóo anunciou que procederán a permitir que os pais elixan o idioma no ensino sempre e cando haxa dispoñibilidade de medios, o novo conselleiro de Educación avanzou que estudarán con atención as posibilidades que hai. Vázquez Abad tamén amosou preferencia pola solución que propugna Feixóo, pero debe cumprir unha serie de prazos para derrogar o decreto e substituílo por outro novo. Este proceso inclúe a redacción do novo texto, a análise tanto por parte do Consello Consultivo como pola banda da Mesa do Ensino e finalmente a aprobación do Consello da Xunta. Neste sentido, os tempos que debe manexar a Consellaría dificultan a instauración do novo modelo no vindeiro curso académico

Vía: A nosa terra.

O idioma ping-pong.

2009-05-02T05:57:00.000-07:00

Feijóo di agora que estudará se será preciso "reformar" o decreto do galego no ensino, no que xustifica como "prudencia e seguridade xurídica" antes de "pactar" a futura ordenanza .
Nun xiro inesperado ao seu "bilingüismo amable", o presidente da Xunta, Alberto Núñez Feijóo di agora que estudará se será preciso "reformar" o decreto do galego no ensino antes de emitir ningunha circular que contradiga os principios do decreto. "A prudencia e a seguridade xurídica aconsellan que para dar esa circular con carácter amplo sería necesaria a modificación do decreto", afirmou onte. Dous días antes, Feijóo manifestaba en declaracións á Cope que os opositores á Xunta poderían elixir entre galego e castelán para examinarse.
Porén, os tempos legais non permitirán que nas oposicións que se convoquen de aquí ó verán poidan elixir ó seu xuízo entre galego e castelán. Así o advirten fontes xurídicas e parlamentarias consultadas por este diario, que recordan que a obrigatoriedade de realizar polo menos unha das probas en galego recóllese na reforma da Lei de función pública de Galicia, aprobada en 2008.
Aínda que o novo Executivo se limitase a modificar o artigo que inclúe esta obrigatoriedade, o 35, os tempos e requisitos lexislativos farían case imposible, segundo fontes parlamentaria, unha nova modificación antes de que finalice o período de sesións na Cámara galega, a finais de xuño, e converten en totalmente improbable unha reforma legal en só cuestión de días ou semanas, a marxe necesaria para que afectase á orde das oposicións de mestres, que se espera que se celebren, como sempre, en xuño.
A Dirección Xeral de Función Pública non poderá tomar cartas no asunto pola súa conta. "Dar instrucións aos tribunais das oposicións para que se faciliten os exames nas dúas linguas estaría violando a lei; e se alguén quisexe denuncialo, estaría poñendo os funcionarios nunha tesitura complicada. É como se lle dis a un garda civil que non faga nada cando atopa un condutor bébedo", compara Alba Nogueira, profesora de Dereito Administrativo da Universidade de Santiago.
A Xunta debe presentar primero un proxecto de lei. Se este se sometese a consulta do Consello Consultivo, como adoita ser habitual, habería que esperar a que estea listo o seu ditame, antes de iniciar a tramitación parlamentaria, que podería durar uns tres meses se a tramitación é moi rápida, engade as fontes parlamentarias.
Para o deputado socialista José Manuel Lage, as palabras de Feijóo sobre o idioma nas oposicións constitúen "manifestacións alegres pouco meditadas". "Parece que o seu guía espiritual está máis en Madrid que na realidade galega", valora o deputado, que critica que a Xunta "xogue" cos intereses das persoas pendentes de presentarse ás oposicións.
Os tempos normativos tampouco xogan a favor para que a modificación do decreto do galego nas aulas estea listo para o curso que vén. O presidente engadiu que quere acordar o borrador do novo decreto, o que supón unha negociación con diferentes colectivos que a priori non parece posible resolver en oito semanas.

Vía: Galicia Hoxe.